УИХ-ын гишүүн Ж.Эрдэнэбатыг суллах шүүхийн шийдвэр гарчээ.
Өнгөрөгч нэгдүгээр сарын 16-нд Улсын дээд шүүх Ерөнхий сайд асан Ж.Эрдэнэбатад 6 жилийн хорих ял оногдуулсан анхан болон давах шатны шүүхийн шийдвэрийг "хууль зүйн үндэслэл, шаардлага хангаагүй" хэмээн хүчингүй болгож, хэргийг прокурорт буцаасан билээ. Өөрөөр хэлбэл, Ж.Эрдэнэбатад холбогдох хэргийн мөрдөн шалгах ажиллагаа үргэлжилнэ, гэхдээ одоогоор шүүх түүний гэм бурууг тогтоогоогүй байна гэсэн үг.
Тиймээс түүний өмгөөлөгч нар хэргийг шалгах хугацаанд түүнд авсан цагдан хорих таслан сэргийлэх арга хэмжээг өөрчлүүлэхээр хүсэлт гаргасныг Сүхбаатар дүүргийн Эрүүгийн хэргийн анхан шатны шүүх хянаж үзээд хүлээн авахаас татгалзсан юм.
Харин өнөөдөр шүүхээс түүнийг Ж.Эрдэнбатыг суллах шийдвэр гаргажээ. Шүүхийн тогтоол хүчин төгөлдөр болмогц Ж.Эрдэнэбат УИХ-ын гишүүний тангаргаа өргөх боломжтой болох юм.
Сануулахад, Өмнөговь аймгийн Гурвантэс сумын нутаг дахь “Улаан сайр-2” хэмээх 1463.82 га талбайг 2017 оны арванхоёрдугаар сард “Элбэг орд” ХХК-иас төрсөн дүү Ж.Эрдэнэтөгстэй хамтран эзэмшдэг “Хэрх илч” компанийн нэр дээр таван сая төгрөгөөр худалдан авч, зургаан сарын дараа уг тусгай зөвшөөрлөө “Алтай констракшн” ХХК-ийн захирал Х.Бат-Эрдэнэд нэг сая төгрөгөөр худалдсан гэх хэрэгт яллагдагчаар татаж, "Улс төрд нөлөө бүхий этгээд өөртөө болон бусдад давуу байдал бий болгож, эрх мэдэл, албан тушаалын байдлаа ашиглах гэмт хэргийг зохион байгуулсан" гэм буруутайд тооцон, нийтийн албанд ажиллах эрхийг таван жилээр хасч, зургаан жил хорих ял оногдуулсан юм.
