Нийслэлд тогтоосон Бүх нийтийн бэлэн байдлын зэргийн байдал өнөөдөр өглөөний 06:00 цагаас эхлэн буурлаа. Ингэснээр аж ахуйн нэгжүүдийн 95 хувь нь эргэн хэвийн үйл ажиллагаагаа эхлүүлээд байна. 

Ерөнхий сайд Л.Оюун-Эрдэнэ өнөөдөр вакцин хийлгэсний дараа ААН-үүдийн үйл ажиллагаатай танилцлаа. Тэрээр эхэнд нь Улсын Их дэлгүүрийг үйл ажиллагаатай нь танилцаж, худалдаа эрхлэгчдийн санал бодлыг сонссон юм. Дараагаар нь фитнесс төвийн үйл ажиллагаатай танилцсан юм.

Ерөнхий сайд Л.Оюун-Эрдэнэ "Өнөөдрөөс аж ахуйн нэгжүүдийн үйл ажиллагаа нээгдэж байгаагаас гадна вакцинжуулалт эхэлж байна. Төр, хувийн хэвшлийн хамтын ажиллагаа маш чухал. Хувийн хэвшлийнхэн халдвар хамгааллын дэглэмээ чандлан баримтлах хэрэгтэй. Төр засгаас аль болох нээлттэй байх бодлого баримтална. Ингэснээр хаагдсан бүхнээ буцаан нээх, алдсан боломжуудаа эргэн олж авч чадах юм.

Харин халдвар хамгааллын дэглэм зөрчигдвөл хумьсан голомтуудаа дахин алдах магадлалтай тул ажил олгогчид туйлын анхааралтай байж, ажилтан албан хаагчдадаа дэглэмийг ягштал баримтлуулахад анхаарч ажиллаарай" гэлээ. 

Мөн тэрээр үргэлжлүүлэн "Хэрэв бид халдвар хамгааллын дэглэмээ ягштал баримталж чадвал энэ сүүлийн хөл хорио байхыг үгүйсгэхгүй. Цаашид бид хөл хорио тогтоохоор бол, математик тооцооллоор тулгуурлаад урьдчилж хэлнэ. Манай улсын хувьд 3-5 сар хамгийн чухал үе. Аж ахуй нэгжүүд маань энэ үед бизнесээ идэвхижүүлэх хэрэгтэй. Удахгүй бид хилээ нээнэ. Мөн дипломат шугамаар болон бусад бизнесийн худалдаагаар орж ирж байгаа томоохон хэлэлцээр хийж байгаа хүмүүс хэрэв вакцин хийлгэсэн бол хилээр чөлөөтэй зорчих боломжийг гаргаж өгнө" гэсэн юм.