Ерөнхий сайд Л.Оюун-Эрдэнэ Нэгдүгээр сарын 30-нд танхимынхаа гишүүдийг томилж, бүрэн бүрэлдэхүүнээрээ ажилдаа ороод удаагүй байна.

Тэгвэл одоо Ерөнхий сайд зөвлөхүүдээ томилж эхэлжээ.

Тухайлбал, Боловсрол шинжлэх ухааны сайд асан Л.Цэдэвсүрэнг Хууль зүйн бодлого хариуцсан зөвлөхөөр томилжээ. Тэрээр 2020 онд Боловсрол, шинжлэх ухааны сайдаар ажиллаж байсан бөгөөд 1994 онд МУИС-ийн хууль зүйн сургуулийг төгссөн, хуулийн магистр цолтой. Соёлын яамнаас ажлын гараагаа эхэлж, 1996-2000 онд Гэгээрлийн яаманд хуулийн зөвлөхөөр, 2000 оноос БСШУСЯ-нд хуулийн хэлтсийн даргаар, төрийн нарийн бичгийн даргаар тус тус ажилласан тэрээр төрийн албанд 25 жил ажилласан туршлагатай юм. 

Мөн А.Амундраг олон нийт, хэвлэл мэдээлэлтэй харилцах зөвлөхөөр томилсон бол Эдийн засгийн бодлого, төсөл хөтөлбөрүүдийг хариуцсан зөвлөхөөр Т.Хаш-Эрдэнийг томилсон байна. 

Хэдийгээр шинэ Засгийн газар ажилдаа ороод 20 гаруй л хонож буй ч “Эрүүл мэндээ хамгаалж, эдийн засгаа сэргээх 10 их наядын цогц төлөвлөгөө”-г танилцуулж, Засгийн газрын ээлжит хуралдаанаар батлаад байгаа билээ.