"Зүрх мартахгүй" төслийн санаачлагч, олон зуун хүүхдийн амийг аварсан алтан гарт эмч Б.Болдсайхан Ходоодны хорт хавдар гэх оноштойгоор гадаадад эмчлүүлэхээр өнөөдөр МИАТ-ын карго нислэгээр явжээ. Түүний эмчилгээ ойролцойгоор хоёр сар орчим үргэлжлэх бөгөөд "Зүрх мартахгүй" төсөл хэвээр үргэлжилж байгаа гэдгийг хэллээ. Б.Болдсайхан эмч онгоцны буудал явхаасаа өмнө буюу өнөөдөр өглөө зүрхний ховдлыг цоорхой нөхөх хагалгаа хийсэн байна.

Тэрээр өөрийн цахим хуудаснаа "Үүрээр эхэлсэн сүүлийн хагалгаа: ховдолын цоорхой нөхөх сайн боллоо .. Одоо онгоцны буудалын зүг.. Уучлаарай .. Нэгдүгээр сарын 13-ы шөнө ходоодноос 3л орчим цус алдаж ухаангүй Сонгдо эмнэлэгтээ хүргэгдэж ирж дурангаар цус тогтоолгосон.. явах дөхсөн... Ходоодны хорт хавдар гэж онош гарсан.. Нэгдүгээр сарын 19-нд эмнэлэгээсээ гарлаа.. Гэхдээ эмнэлэгт байх хоорондоо явах өдөрөө хүртэл хойшлуулашгүй хүндэрсэн хүүхэдүүдийн хагалгаа орсон...

Өнөөдөр эмчилгээнд яваад 1 сар хагас орчим болоод ирэх байх... “Зүрх мартахгүй” төсөл зогсохгүй ээ. Намайг байсан ч байхгүй ч үргэлжлүүлээд явах 20-д хүнтэй чадвартай сайн баг Бямбасүрэн, Доржсүрэн, Буянтөгс, Гэрэлмаа, Зоригоо, Намхайдорж, Эрдэнэбаатар, Хашчулуун эмч нараар ахлуулаад үлдэж, ажлаа хийнэ.

Уучлаарай: Нэгт, МИАТ ачааны карго онгоцонд билетээ аваад нислээ... битгий бүүр их муу хэлж, шүүмжилж, үзэн ядаарай, хэн нэгнийг хойш урагш болгоогүй ээ...

Уучлаарай: Хоёрт, Зун намаржин ходоод өвдсөн ч дурандуулалгүй дараа 7 хоногт гэж өвчтөндөө огт зөвшөөрдөггүй байж өөрөө гаргасан тэнэглэлээс өвчин хожуу мэдэж хүндэрсэнд... Үүний улмаас “Зүрх мартахгүй” төсөлөөр зүрхний хагалгаанд орж амжих байсан жоохон хүүхдүүдийн өмнө уучлал гуйя. Хоёр сарын дараа дэлгэр Монгол орондоо яаран яаран ирж уулзахын ерөөл тавия!" гэжээ.