ОХУ-тай хиллэдэг Боршоо боомтоор орж ирсэн ОХУ-ын хоёр жолоочоос коронавирус илэрчээ. Үүний улмаас Засгийн газрын ээлжит бус хуралдаж, ачаа тээврийг нэвтрүүлж буй зарим хилийн боомтыг түр хаах асуудлыг хэлэлцсэн байна. Эцэст нь ОХУ-тай хиллэдэг Цагааннуур, Боршоо боомтыг хаахаар болсон тухай Шадар сайд Я.Содбаатар мэдээллээ. 

Я.Содбаатар: 

-"Засгийн газрын ээлжит бус хуралдаанаас цар тахлаас урьдчилан сэргийлэх зорилгоор Монгол-ОХУ хоорондын хилийн Цагааннуур, Боршоо боомтыг аравдугаар сарын 2-ноос 21 хоногийн хугацаагаар хаах шийдвэр гаргалаа. Учир нь манай улстай хиллэдэг ОХУ-ын бүс нутагт өвчлөл нэмэгдэж байгаа учраас урьдчилан сэргийлэх зорилгоор энэ арга хэмжээг авч байна" гэв. 

Мөн энэ асуудлаас болж коронавирусы халдварыг дотооддоо алдсан байх вий гэдэг айдас, болгоомжлол олон нитийн дунд тарсан тул Эрүүл мэндийн сайд Т.Мөнхсайхан энэ талаар сэтгүүлчдийн асуултад хариуллаа.

Т.Мөнхсайхан: 

-"Коронавирусийн халдварыг дотоодод алдсан тохиолдол байхгүй. Бид тандалтын шинжилгээг байнга хийж байна. Энэ тал дээр санаа зоволтгүй. Гэвч хилийн чанад дахь нөхцөл байдал хүндэрч байгаа тул хилийн боомтууд дахь хяналтаа чангаруулж байна" гэв.

Мөн "ОХУ-ын иргэн, ачаа тээврийн хоёр жолоочийн шинжилгээний хариу өнгөрсөн шөнө гарсан байхад өнөөдөр 11:00 цагийн мэдээгээр яагаад мэдээллээгүй вэ?" гэсэн сэтгүүлчдийн асуултад "Шинжилгээний хариу шөнө гарсан. Гэвч дахин шинжилгээ хийж, баталгаажуулах шаардлагатай байсан. Давтан шинжилгээний хариу үдээс хойш гарсан" гэв.