УИХ-ын ээлжит сонгуульд сонгогчийн нэрсийн жагсаалтад бүртгэгдсэн 2 сая 3 мянга 969 сонгогч бүртгэгдсэнээс 1 сая 475 мянга 895 иргэн саналаа өгсөн талаар өнөөдөр СЕХ-ноос мэдээллээ.
СЕХ-ны Мэдээлэл, судалгаа, арга зүйн хэлтсийн дарга Б.Оюумаа: "Санал хураалт 22.00 цагт дууссан. УИХ-ын сонгуулийн тухай хуулиар нийт хэсгийн хороодын 50 хүртэл хувьд хяналтын тооллого хийж болно. Ингээд сум, дүүргийн сонгуулийн хороод хуралдаж, нийт 849 хэсэгт хяналтын тооллого хийх шийдвэр гарсан. Одоогоор 2 хэсгийн хяналтын тооллого үргэлжилж байна. Бусад хэсгийн хяналтын тооллого дууссан бөгөөд дүн нь санал тоолох автомат төхөөрөмжийнхөөс зөрсөн тохиолдол гараагүй. Өнөөдөр СЕХ хуралдаж, санал хураалтын эцсийн дүнг хэлэлцэнэ. Сонгогчдийн ирц 73.65 хувьтай байсан" гэв.