Улсын наадам болоход сар гаруйхны хугацаа үлдээд байна. Өнгөрсөн жилийн наадмын түрүү, улсын аварга Э.Оюунболдоос допинг илэрч, цолыг нь хураах шийдвэр гарсан ч тэр Үндэсний бөхийн хорооны уг шийдвэрийг эсэргүүцэж, шүүхээр заргалдаж байгаа билээ. Шүүх хурал өнөөдөр/2020.06.03/ Нийслэлийн Захиргааны хэргийн Анхан шатны шүүх дээр эхэлсэн боловч нэхэмжлэгч буюу Э.Оюунболд өөрийн биеэр оролцох шүүх хуралдаанд оролцох хүсэлтээ гаргаснаар шүүх хурлыг дахин хойшлуулж, зургадугаар сарын 17-ны өдрөөр дахин товлосон байна.
Өмнөх шүүх хуралдаан нь өнгөрсөн тавдугаар сарын 22-нд зарлагдсан боловч шүүх танхимд Э.Оюунболд өөрийн биеэр ирэлгүй өмгөөлөгчөө явуулсан билээ. Харин өмгөөлөгч нь “Нэхэмжлэгч Э.Оюунболдтой өмгөөллийн гэрээгээ өнөөдөр байгуулсан тул хэргийн материалтай танилцах шаардлагатай” гэсэн шалтгаанаар шүүх хурлыг хойшлуулах хүсэлт гаргасан юм байна.
