Өргөдлийн байнгын хорооны дарга, УИХ-ын гишүүн М.Оюунчимэг өчигдөр агаарын бохирдлыг бууруулах чиглэлээр үйл ажиллагаа явуулдаг зарим байгууллагын хийж буй ажилтай танилцлаа.

Энэ үеэрээ Хан-Уул дүүрэгт байрлах Нийслэлийн зорчигч тээврийн нэгтгэлийн их багтаамжийн дизель хөдөлгүүрийн автобуснуудад суурилуулсан дизель хөдөлгүүрийн тортогжилт шүүх төхөөрөмж агаарын бохирдлыг бууруулахад эерэг нөлөө үзүүлж байгаа эсэхтэй танилцав.

Япон улсын "Жайка" байгууллагатай хамтран хэрэгжүүлсэн их багтаамжийн дизель түлшийн автобусанд DPF буюу дизель хөдөлгүүрийн тортогжилт шүүгчийг 24 автобусанд суурилуулжээ. Мөн нийслэлийн зорчигч тээврийн нэгтгэлийн ОНӨАТҮГ-ын 9 автобусанд суурилуулсан байна. Харин 10-11 жил болж, ашиглалтын хугацаа нь дуусаж буй автобусанд шүүлтүүр суурилуулах нь үргүй зардлын нэг болно гэдгийг тэд хэлж байна.

Тус компани Агаарын бохирдлыг бууруулах ажлын хүрээнд Эко цахилгаан автобусыг ирэх долоо хоногоос хотын төвийн чиглэлүүдэд туршилтанд гаргахаар болжээ.

Энэ тухай Зорчигч тээврийн нэгтгэл ОНӨААТҮГ-ын захирал Г.Төмөрбаатар: -“Манайх олон цахилгаан автобус туршиж байгаа. Тэдгээр туршилтын автобуснаас Зорчигч тээврийн нэгтгэлд 10 ирсэн. Одоогоор монгол инженерүүд Монгол стандартад нийцүүлж, техникийн хувьд туршилтын арга хэмжээг авч байна. Автобусуудыг дулаан оронд ашиглаж байсан автобус учраас тос нь болохгүй байна гэсэн асуудал туршилтын явцад гарч байна. Автобусыг долоо хоногийн дараа туршилтад гаргаж, төв замаар явуулахаар төлөвлөж байна” гэв.

Уг цахилгаан автобус нь дулааны улиралд 200 километр явах чадалтай бөгөөд гурван сарын хугацаанд туршиж үзээд үнэлэлт дүгнэлтээ өгөх гэнэ. Автобусыг зориулалтын цэгт 8-15 минутанд бүрэн цэнэглэх боломжтой. Цэнэг нь -50-аас +60 градуст нурахгүй, цэнэглэлтийнхээ өндөр хүчдэлийг даадаг онцлогтой гэнэ.