Ираны алдарт бөх, ДАШТ-ий алтан, хүрэл медальт Саид Моллаи Монгол улсын нэрэн дор дэлхийн дэвжээнд зодоглохоор болжээ. Улс төрийн асуудлаас болж Ираны иргэншлээс татгалзсан Саид Моллаи цаашид Монголын нэр дор барилдах ба тэрээр энэ сарын 12-14-нд Хятадын Чиндаод болох "Мастерс"-ын тэмцээнд Монголын шигшээ багт барилдахаар мэдүүлэгт нэрээ өгчээ. Энэ тухай judoinside.com сайт албан ёсоор мэдээлээд байна.
Түүнчлэн Монгол улсын Ерөнхийлөгч Х.Баттулга түүнийг хүлээн авч уулзсан зураг сошиалд тараад байгаа ба сайн анзаарвал Ерөнхийлөгч Х.Баттулга Монгол Улсын иргэний үнэмлэх гартаа барьжээ. Гэвч одоогоор энэ тухай Ерөнхийлөгчийн тамгын газраас албан ёсоор мэдээлэл өгөөгүй байна.
Ираны иргэншлээс татгалзсан Саид Моллаин өнгөрсөн хугацаанд Германаас улс төрийн орогнол хүссэн ч иргэншил авч чадаагүй ба Олон улсын жүдо бөхийн холбооны дүрвэгчдийн багийн нэр дээр тэмцээнд оролцож байсан юм.
Тэрээр Монгол бахархлын өдөр буюу Чингис хааны мэндэлсэн өвлийн тэргүүн сарын шинийн нэгэнд болдог бөхийн барилдааныг Саид Моллаи үзсэн нь спорт сонирхогчдын анхааралд өртсөн. Монголд бэлтгэл хийхээр ирж хэмээн таамаглаж байсан юм.
Ираны Засгийн газраас тамирчдаа Израилын бөхчүүдтэй барилдахыг хориглосноос Ираны жүдочид энэ жил Токиод болсон ДАШТ-д барилдаагүй. ДАШТ-ий дараа Олон улсын жүдо бөхийн холбооны ерөнхийлөгч Мариус Визер “Бид Саид Моллаин асуудлыг олон нийтэд дэлгэсэн нь түүнийг болон гэр бүлийг нь хамгаалах зорилготой байлаа. Засгийн газрынхаа шийдвэрээр ДАШТ-д оролцож чадаагүй бусад Иран жүдочдын талаар ч бид ярих болно. Саид Моллаи өөр орны нэр дээр барилдахыг хүсвэл бид түүний чансааны оноог цуцлахгүй” гэж мэдэгджээ.
Дүрэм ёсоор бол тамирчин иргэншилээ сольсон тохиолдолд дэлхийн чансааны оноогоо хасуулах учиртай. Гэхдээ IJF буюу Олон улсын жүдо бөхийн холбоо улс төрийн шаардлагаар иргэншлээ сольсон Саид Моллаин хувьд онцгой нөхцөл байсан хэмээн үзэж, оноог нь хэвээр үлдээжээ.
Манай улсын шигшээ баг 81 кг-ын жинд О.Ууганбаатар, Н.Дагвасүрэн зэрэг олон шилдэг жүдочтой. Хэрэв Саид Моллаи Монгол улсын нэрийн өмнөөс барилдвал энэ жингийн чансаа ахих ч манай бөхчүүдийн амжилт арагш ухрахад хүрч магадгүй.
Саид Моллаи нь ДАШТ-ий алт, хүрэл, Азийн наадмын мөнгө, Азийн АШТ-ий нэг мөнгө, хоёр хүрэл медальт Дэлхийд тэргүүлэгч тамирчин юм.
