“Warner Bros” компанийн бүтээл “Joker” уран сайхны кино дэлхий дахинаас нэг тэрбум ам.долларын орлого олсон анхны “R-rated” ангиллын /17-оос доош насны хүүхдүүд асран хамгаалагчийн хамтаар үздэг/ киногоор тодорчээ.

“DC” комикийн дүрүүдээс сэдэвлэн бүтээсэн “Joker” киног Тодд Филлипс найруулж, Хоакин Феникс гол дүрийг бүтээсэн юм. “Joker” энэ долоо хоногийн шилдэг кинонуудын жагсаалтад долдугаар байрт бичигдсэн бол “Ford v Ferrari” кино 31 сая ам.долларын орлого олсноор уг жагсаалтыг тэргүүлсэн байна.

Өмнөх жилүүдтэй харьцуулахад киноны орлого нэг тэрбум ам.доллар давахад тийм ч хэцүү байхаа больсон хэдий ч “Joker” уг амжилтыг тогтоосон анхны “R-rated” ангиллын кино юм. Энэ онд “Aquaman”, “Toy Story 4”, “The Lion King”, “Captain Marvel”, “Avengers: Endgame”, “Aladdin”, “Spider-Man: Far From Home” зэрэг кино нэг тэрбум ам.доллароос дээш хэмжээний орлого олжээ.

“Aquaman” 2018 оны сүүлээр нээлтээ хийсэн боловч орлогын хэмжээ нь 2019 оны эхээр нэг тэрбум ам.долларт хүрчээ.