АНУ-ын ерөнхийлөгч Дональд Трамп долдугаар сард Украины ерөнхийлөгчтэй утсаар ярихдаа өөрийн өрсөлдөгч, дэд ерөнхийлөгч асан Жо Байдены хүүгийн компанитай холбоотой хэргийг дахин шалгахыг хүссэн билээ. Тэрээр Володимир Зеленскийд шахалт үзүүлэхийн тулд АНУ-аас Украинд үзүүлэх $400 саяын тусламжийг хойшлуулсан хэмээн Ардчилсан намынхан буруутгаж байна. Трампын хууль зөрчсөн энэ үйлдлийг шалгах ажлыг конгресс эхлүүлээд байгаа.

Тэгвэл Украин улсын ерөнхий прокурор өчигдөр Жо Байдены хүү Хантер Байдентай холбоотой эрчим хүчний компанийн хэргийг сэргээн шалгахаар болсныг мэдэгджээ. Байгалийн хийн Бурисма компанийн удирдах зөвлөлийн гишүүнээр Хантер Байден ажилладаг.

Украины эрх баригчид өмнө нь Бурисматай холбоотой хэргүүд нь Хантер Байденыг тус компанийн удирдах зөвлөлд орохоос өмнөх цаг үетэй холбоотой болохыг мэдэгдэж байв. Бурисма нь Украины хувийн эзэмшлийн хамгийн том байгалийн хий үйлдвэрлэгч юм. Обамагийн засаг захиргааны үед дэд ерөнхийлөгч байсан Жо Байден хүүгийнх нь компанийг шалгаж байсан прокурорын ажлыг зогсоолгохын тулд Украины засгийн газарт нөлөөлсөн гэх цуурхал гарсан байна.

Энэ цуурхлын үнэн эсэхийг шалгуулснаар 2020 оны ерөнхийлөгчийн сонгуульд Ардчилсан Намаас өрсөлдөх магадлалтай байгаа Жо Байдены нэр хүндийг унагана гэж Трамп тооцоолсон байна. Украины ерөнхий прокурор Руслан Рябошапка уг компанитай холбоотой өмнө шийдэгдсэн болон хаагдсан нийт 15 хэргийг дахин шалгах болсныг сэтгүүлчдэд мэдэгджээ. Гэхдээ энэ нь Жо Байдены хүүтэй холбоотой гэсэн үг биш. Бид өмнөх ерөнхий прокурорын үед хэргүүд үнэн зөв шийдэгдсэн эсэхийг дахин шалгана гэжээ.

Эх сурвалж: AFP