Америкийн Миссури мужийн иргэн Дэвид бага-Берриг зуу орчим буга алсных нь төлөө нэг жил шоронд хорьж, хоригдож байх хугацаанд нь хамгийн багаар бодоход сард нэг удаа хүүхэлдэйн “Бэмби” кино үзүүлэх ялаар шийтгэлээ гэж WTRF.com хэвлэл мэдээлжээ.
Бага-Берригийн энэ үйлдэл Миссури мужийн түүхэнд хамгийн том гэмт хэрэгт тооцогдож байна. Тэр ердөө л бугийн толгойг авах зорилгоор алаад, биеийг нь ойд тэр чигт нь хаяж орхидог байжээ. Цагдаагийнхан түүнийг нэг танил, төрлийн нь гурван хүний хамт саатуулсан юм байна. Тэд торгууль болон шүүхийн зардалд 51 мянган ам.доллар төлжээ. Эхийг нь хулгайн анчид алсан илийн тухай Диснейн “Бэмби” хүүхэлдэйн кино 1942 онд дэлгэцнээ гарсан юм.
Х.Өлзийбаяр