Улаанбаатар хотын Ерөнхий менежерийн 2025 оны долдугаар шуурхай зөвлөгөөн өнөөдөр боллоо. Зөвлөгөөнийг Улаанбаатар хотын Ерөнхий менежер бөгөөд Захирагчийн ажлын албаны дарга Г.Батзориг удирдан явуулсан бөгөөд өмнөх хурлаар өгсөн үүрэг даалгаврын хэрэгжилтийн явц, нийслэлийн хууль тогтоомжийн хэрэгжилт, орчны аюулгүй байдал, хог тээвэрлэлт, цэвэрлэгээний тусгай зориулалтын техник хэрэгслийн талаар холбогдох байгууллагууд мэдээлэл хийлээ.

Шуурхай зөвлөгөөний үеэр Ерөнхий менежер Г.Батзориг “Үүрэг даалгавар хангалтгүй биелүүлдэг байгууллагуудад хариуцлагын асуудлыг ярина. Үүрэг биелүүлээгүй газруудад албан мэдэгдэл хүргүүлнэ. Бидний хурал үр дүнтэй, тодорхой ахицтай байх ёстой” хэмээн анхаарууллаа.

Мөн тэрбээр хаврын хуурайшилт ихсэж, тоосжилт нэмэгдэж байгаатай холбогдуулан нийтийн эзэмшлийн талбайн усалгааг өглөөний түгжрэлийн өмнө зохион байгуулах, ногоон байгууламжийн хэлбэржүүлэлт, хог цэвэрлэгээг сайжруулах талаар дүүргийн удирдлагуудад онцгойлон үүрэг өгсөн байна.

Түүнчлэн инженер хангамжийн байгууллагууд болон дүүргүүд ирэх дөрвөн жилийн ажлын төлөвлөгөөгөө уялдуулах уулзалтыг ирэх долоо хоногт зохион байгуулах, хяналт шалгалтын ажлыг эрчимжүүлэх, хяналтын ажлын тайланг хариуцсан дарга нараар бэлтгүүлэх үүргийг мөн өгсөн юм.

Энэ удаагийн хурлаар дараах 13 үүрэг даалгаврыг холбогдох байгууллагуудад өглөө:

• Инженер хангамжийн чиглэлээр – 2 үүрэг

• Хог хаягдлын менежментийг сайжруулах чиглэлээр – 5 үүрэг

• Тохижилт, ногоон байгууламжийн чиглэлээр – 5 үүрэг

• Хүнс хангамжийн чиглэлээр – 1 үүрэг

Нийслэлийн Ерөнхий менежерийн зүгээс цаашид хариуцлага, сахилга бат, ажлын гүйцэтгэлд илүү өндөр шаардлага тавьж ажиллахаа мэдэгдлээ.

Эх сурвалж: Улаанбаатар хотын Захирагчийн ажлын алба