Дорноговь аймгийн Эрдэнэ сумын Засаг дарга И.Батсүрэн захирамж гарган, сумын хэмжээнд электрон тамхи болон түүний дагалдах хэрэгсэлийг 2025 оны тавдугаар сарын 7-ноос эхлэн худалдаалахыг бүрэн хоригложээ. Энэ шийдвэр нь өсвөр насны хүүхдийг электрон тамхины хэрэглээнээс хамгаалах, эрүүл орчинд өсч бойжих боломжийг хангах зорилготой аж.

Захирамжид тусгаснаар хэрэглэгчийн аюулгүй байдлыг хангах, хууль тогтоомжийн хэрэгжилтийг сайтар хангаж ажиллахыг холбогдох байгууллага, ажил хариуцсан албан тушаалтнуудад үүрэг болгосон байна. Мөн өсвөр үеийнхний эрүүл мэнд, хөгжлийг дэмжих хүрээнд электрон тамхины хэрэглээг бууруулах чиглэлээр нийгэмд сэрэмжлүүлэг, мэдээлэл түгээхийг онцлон анхааруулжээ.

Электрон тамхинд агуулагдах никотины хэмжээ нь нэг ширхэг электрон тамхинд дунджаар 20 ширхэг янжуур тамхитай тэнцэхүйц байдаг бөгөөд энэ нь донтуулагч нөлөөг өндөр хэмжээнд үзүүлж, эрүүл мэндэд ноцтой хор хөнөөл учруулдгийг Дэлхийн эрүүл мэндийн байгууллага болон Монгол Улсын Эрүүл мэндийн байгууллага анхааруулсаар ирсэн.

Эрдэнэ сум нь Улаанбаатар хотоос 550 км, аймгийн төв Сайншанд хотоос 100 км зайд оршдог бөгөөд төмөр зам, авто замын хос тээврийн дэд бүтэцтэй, 2400 гаруй хүн амтай сум юм.

Эх сурвалж: Эрдэнэ сумын Засаг даргын захирамж