Засгийн газраас Хэвлэл мэдээллийн эрх чөлөөний хуульд нэмэлт өөрчлөлт оруулах тухай хуулийн төслийг өргөн барьж, УИХ-аар хэлэлцэж эхлээд байна. Сэтгүүлчид, хэвлэл мэдээллийн салбарт ажиллагсдын дунд багагүй шүүмжлэл, эсэргүүцэл дагуулаад байгаа уг хуулийн төслийн талар иргэний нийгмийн байгууллагууд байр сууриа илэрхийлж эхэллээ. 

"Бодлогод залуусын хяналт" ТББ-ын тэргүүн Ц.МАНДХАЙХАТАН:

-Иргэдийн үзэл бодлоо илэрхийлэх, хэвлэн нийтлэх үндсэн эрх, эрх чөлөө хэвлэл мэдээллийн эрх чөлөөгөөр баталгааждаг боловч манай улсын үзүүлэлт тогтмол ухарч “хүнд нөхцөлтэй” ангилалд орж байгаа энэ үед “эрх чөлөөний баталгаа” болсон хуулийн зохицуулалт хэрэгтэй. Хэдий тийм боловч өргөн барьсан хуулийн төсөл нь хожим субьектив агуулгаар хяналт, цензур тогтооход ашиглагдах, шүүхийн шатанд хууль хэрэглээний ойлгомжгүй байдал бий болгож болзошгүй байна.

ЮНЕСКО-гийн зүгээс ч 45 зүйлтэй хуулийн төсөлд 46 сайжруулах, нэмж тусгах саналыг хүргүүлэн, хуулийн хүчин чадлыг “органик хууль”-ийн хэмжээнд авч үзэхийг зөвлөсөн. Хамгийн анхаарал татаж буй асуудал бол төсөл нь бусад хууль болон эрүүгийн хуультай уялдаагүй, сэтгүүлчид 34 гаруй зүйлийн гэмт хэрэгт шалгагдах эрсдэлтэй байна. Мөн сэтгүүлчийн эх сурвалжаа нууцлах эрхийг хэлбэрийн төдий тодорхойлж, сэтгүүл зүйн үйл ажиллагааны баталгааг хангасан, төрийн оролцоог зохистой хязгаарлсан зохицуулалтууд төсөлд тусгаагүйг онцолж байна.

Товчдоо хуулийн төсөл нь хэвлэн нийтлэх эрх чөлөөг хязгаарлах эрсдэлтэй. Хэвлэл мэдээллийн байгууллагуудыг хуулийн аргаар залхаан цээрлүүлэх, цензурдэх арга хэмжээ авах нь хэвлэлийн эрх чөлөөг хязгаарлаж, иргэдийн мэдэх эрхийг боомилох, эрэн сурвалжлах, хараат бус сэтгүүл зүйн үйл ажиллагаанд хортой үр дагавртай, хүлээн зөвшөөрөх боломжгүй залхаан цээрлүүлэлт. Тиймээс бид хууль эрх зүйн асуудалд анхаарч ажиллаж байна.