Япон, АНУ-ын судлаачдын баг солироос авсан чулуу, тоосонцрын дээжээс зургаан төрлийн сахар илрүүлжээ. Энэхүү нээлт нь амьдрал үүсэн бий болоход шаардлагатай найрлагууд Дэлхийн гадна оршин байх магадлалтайг харуулж байна.

Эрдэмтэд Нарны аймаг дахь Бенну бага гаргаас АНУ-ын Агаарын нислэг, сансрын уудмыг шинжлэн судлах төвийн /НАСА/ гараг хоорондын сансрын төхөөрөмжөөр цуглуулсан 0.6 грамм дээжийг шинжилжээ. 

Судалгаагаар илэрсэн зургаан төрлийн сахарт генийн мэдээллийг дамжуулдаг РНХ-ийн бүрэлдэхүүн хэсэг болох рибоз, мөн амьд организмын энергийн гол эх үүсвэр гэгддэг глюкоз байсан байна.

Беннугийн дээжээс анх удаа сахар илэрсэн нь энэ ажээ. Үүнээс өмнө Дэлхий дээрх амьд организмд уургийг нийлэгжүүлэхэд ашигладаг амин хүчлүүд, мөн ДНХ ба РНХ-д генийн зааварчилгааг хадгалах, дамжуулахад оролцдог таван төрлийн азотын суурь л илэрч байжээ. Өмнө нь дэлхийд унасан солируудаас зарим төрлийн сахар илэрч байсан байна. 

Судалгааны багийнхны мэдэгдсэнээр, энэхүү шинэ нээлт нь амьдрал үүсэн бий болоход шаардлагатай элементүүд Дэлхийгээс гадуур аль хэдийн оршин байсан бөгөөд тэдгээрийг солирууд манай гарагт авчирсан байх магадлалыг улам бататгаж байна. “Амьдралын үндсэн элементүүд сансраас ирсэн байж болзошгүй нь улам бүр тодорхой болж байна” гэж Тохокүгийн их сургуулийн Шинжлэх ухааны дээд сургуулийн дэд профессор Фүрүкава Ёшихиро хэлжээ. Гэхдээ амьдрал сансраас ирсэн эдгээр элементээс үүссэн үү, эсвэл Дэлхий дээр өөрөө химийн урвалын үр дүнд бий болсон уу гэдэг нь одоогоор асуулт хэвээр байгаа тул судалгааг цаашид үргэлжлүүлнэ гэдгийг эрдэмтэд мэдэгдсэн байна. 

Эх сурвалж: NHK