2025 оны тавдугаар сарын 8-ны өдөр 22 цаг 23 минутад Хэнтий аймгийн Өмнөдэлгэр сумын төвөөс баруун хойд зүгт 109 км, Батширээт сумаас баруун зүгт 79 км, Төв аймгийн Мөнгөнморьт сумаас зүүн хойд зүгт 76 км зайд 4.7 магнитудын хүчтэй газар хөдлөлт болсон байна.
Газар хөдлөлтийн чичирхийлэл орон нутгийн иргэдэд мэдрэгдсэн ч ямар нэгэн хохирол учраагүй тухай Онцгой байдлын ерөнхий газраас мэдээллээ. Мөн энэхүү чичирхийлэл нийслэлийн Багануур, Баянзүрх, Сонгинохайрхан, Чингэлтэй, Баянгол, Сүхбаатар дүүргүүдэд иргэдэд мэдрэгдсэн байна.
Он гарсаар Монгол Улсын нутаг дэвсгэрт 3.5-5.1 магнитудын хүчтэй газар хөдлөлт нийт 12 удаа бүртгэгдээд байна. Энэ нь газар хөдлөлтийн идэвхжил нэмэгдэж буйг илтгэж байгаа тул мэргэжлийн байгууллагууд иргэдэд болзошгүй эрсдэлээс сэргийлэх анхааруулга, зөвлөмжийг тогтмол хүргэж ажиллаж байна.
Эх сурвалж: Онцгой байдлын ерөнхий газар.
