Завхан аймгийн хэмжээнд хийсэн гамшгийн эрсдэлийн үнэлгээгээр Улиастай, Тосонцэнгэл, Алдархаан сум өндөр эрсдэлтэй, бусад 21 сум дунд эрсдэлтэй хэмээн үнэлэгдсэн байна. Аймгийн хэмжээнд гал түймрийн аюул өндөр, өртөнги, эмзэг байдал дунд, чадавх сул үнэлэгдэж, нийт эрсдэлийн түвшин 51.00 оноогоор дунд эрсдэлтэй хэмээн дүгнэгджээ.

Гамшгаас хамгаалах тухай хуулийн дагуу нутаг дэвсгэрийн нэгжүүд гамшгийн нарийвчилсан болон ерөнхий үнэлгээг хийж, эрсдэлээс урьдчилан сэргийлэх арга хэмжээг төлөвлөх үүрэгтэй байдаг. Үүний хүрээнд Завхан аймаг жилд дунджаар 110-130 удаагийн аюулт үзэгдэл, осол, гал түймрийн дуудлага хүлээн авдаг бөгөөд нийт дуудлагын 45-50 хувийг объектын гал түймэр эзэлж байна. Энэ оны нэгдүгээр улиралд л гэхэд объектын гал түймрийн дуудлага 10 удаа ирж, өмнөх оны мөн үеэс 30 хувиар өссөн үзүүлэлттэй байна.

Улиастай сумын нийт айл өрхийн 62 хувь нь гэр болон хувийн орон сууцанд амьдардаг бол аймгийн 24 сумын барилга байгууламжийн 60 хувийг модон хийцтэй барилга эзэлдэг нь гал түймрийн эрсдлийг улам нэмэгдүүлж байна. Түүнчлэн Улиастай, Тосонцэнгэл сумын төвийн худалдаа үйлчилгээний төвлөрсөн бүсүүдэд барилгууд хэт ойрхон, модон хийцтэй баригдсан тул гал түймэр гарах нөхцөл бүрдэж, эрсдэл өндөр байгаа аж. Мөн шатахуун түгээх станцууд төв зам дагуу хэт ойрхон байрласан нь онцгой аюул үүсгэж байна.

Энэхүү эрсдэлийг бууруулахын тулд дараах арга хэмжээг авах шаардлагатайг Завхан аймгийн Онцгой байдлын газар санал болгожээ:

• Сургуулийн өмнөх болон ерөнхий боловсролын сургалтын хөтөлбөрт гал түймэр, гамшгийн үед өөрийгөө болон бусдыг хамгаалах мэдлэг олгох аюулгүй амьдрах ухааны хичээлийг тусгах.

• Сум, аж ахуйн нэгжийн дунд гамшиг, гал түймрийн сайн дурын хэсгийн болзолт уралдаан зохион байгуулж, шалгарсан байгууллагыг шагнаж урамшуулах.

• Сум, багийн Засаг дарга нар айл өрх, аж ахуйн нэгж байгууллагад төлөвлөгөөт хяналт шалгалт зохион байгуулж, галын аюулгүй байдлын заавар зөвлөмж өгөх.

• Галын аюулгүй байдлын стандарт, норматив зөрчсөн олон нийтийн барилгын аюулгүй байдлыг сайжруулж, шинэчлэх, их засвар хийж, дахин төлөвлөлтөд хамруулах.

Завхан аймгийн Онцгой байдлын газраас эдгээр арга хэмжээг цаг алдалгүй авч хэрэгжүүлэх шаардлагатайг онцлон анхааруулж байна.

Эх сурвалж: Завхан аймгийн Онцгой байдлын газар