Канад Улсын санхүүжилттэй, төрийн албаны ёс зүй, хүртээмж, хүний эрхийг дээдлэхэд чиглэсэн Канад–Монголын “Мерит” төсөл нээлтээ хийлээ. Энэхүү төсөл нь 2030 он гэхэд орон нутгийн иргэдийн хэрэгцээнд нийцсэн, иргэн төвтэй төрийн албыг төлөвшүүлэх, иргэдийн оролцоо, төрийн үйл ажиллагааны чанарыг нэмэгдүүлэх зорилготой юм.

Төслийг 2016–2024 онд уул уурхайн засаглалыг дэмжих төсөл амжилттай хэрэгжүүлсэн “Каталист плас” байгууллага хариуцан хэрэгжүүлж байна. Энэ удаад төрийн албаны шинэчлэл, хүний эрх, жендерийн мэдрэмж зэрэг олон тулгуур асуудлыг хамарсан цогц хөтөлбөр хэрэгжүүлэхээр төлөвлөсөн бөгөөд дараах байгууллагууд хамтран оролцож байна:

• Төрийн албаны зөвлөл

• Хүний эрхийн Үндэсний комисс

• Жендерийн үндэсний хороо

• Аймаг, орон нутгийн захиргааны байгууллагууд

Төслийн хүрээнд төрийн албан хаагчдад зориулсан сургалт, зөвлөх үйлчилгээг орон нутгийн түвшинд хүргэж, төрийн албаны тухай хуулийн хэрэгжилтийг үнэлэх, сайжруулах арга хэмжээ авна.

Төслийн онцлог бүсчлэл:

• Төвийн бүс – Дархан-Уул

• Баруун бүс – Увс

• Говийн бүс – Дундговь

• Зүүн бүс – Сүхбаатар

УИХ-ын гишүүн, Монгол–Канадын парламентын бүлгийн дарга Г.Дамдинням энэ төслийг бүсчилсэн хөгжлийн бодлоготой уялдаж байгааг онцлон тэмдэглэж, Канадын ардчилсан, жендерийн мэдрэмжтэй төрийн албаны туршлагыг Монголд нутагшуулах боломж нээгдэж буйг талархан хүлээн авлаа.

Төслийн суурин төлөөлөгч Женифер Адамс “Орон нутгийн төрийн албан хаагчдын хууль, бодлогыг хэрхэн ойлгож, хэрэгжүүлж буй нь иргэн төвтэй төрийн үйлчилгээний чанарт шууд нөлөөлдөг. Тиймээс орон нутгийн чадавхийг сайжруулах нь нэн чухал” хэмээн онцлов.

Эх сурвалж: Канад–Монголын “Мерит” төсөл, Төрийн албаны зөвлөл