Нагасаки хотын дарга Сүзүки Широ энэ оны наймдугаар сарын 9-нд болох энх тайвны ёслолд Японд дипломат төлөөлөгчийн газартай бүх улс орон, бүс нутгийг урихаар төлөвлөж байгаагаа мэдэгдлээ. Энэ жил АНУ тус хотод атомын бөмбөг хаясны 80 жилийн ой тохиож байгаа нь энэхүү шийдвэр гаргах шалтгаан болсон байна.
Нагасаки хотын захиргаа 2021 оноос хойш анх удаа бүх улс орон, бүс нутгийг урихаар шийдвэрлэсэн нь энэ юм. Өнгөрсөн жил Израилыг уриагүй бөгөөд 2022 онд Орос, Беларусь улсуудыг мөн хассан байсан. Тухайн үед хотын захиргаа энх тайвны ёслолыг тайван, ёслол төгөлдөр зохион байгуулахыг илүүд үзэж, тодорхой улс орнуудыг урихгүй байх шийдвэр гаргаж байжээ. Харин зарим орны төлөөлөгчид, тэр дундаа АНУ-ын Элчин сайд уг шийдвэрийг эсэргүүцэн ёслолд оролцоогүй юм.
Хотын дарга Сүзүки Широ хэвлэлийн бага хуралд хэлэхдээ, "ялангуяа олон улсын хамтын нийгэмлэгийн талцал хуваагдал гүнзгийрч байгаа энэ цаг үед" улс орнуудыг энх тайвны үнэ цэнийг биечлэн мэдрэх боломжийг олгох нь чухал гэж онцолсон байна. Тэрбээр атомын зэвсгийн аймшигт үр дагаврыг оролцогчид нүдээр харж, чихээр сонсож, зүрх сэтгэлээрээ мэдрээсэй хэмээн хүсч буйгаа илэрхийллээ.
Ёслолын үеэр аюулгүй байдлыг дээд зэргээр хангаж, тайван, ёслол төгөлдөр зохион байгуулах хатуу арга хэмжээнүүдийг хэрэгжүүлэхээр Нагасаки хотын захиргаа ажиллаж байна.
Эх сурвалж: NHK
