Монгол Улсын Их Хурлын дарга Д.Амарбаясгаланд өнөөдөр (2025.05.09) УИХ-ын гишүүн, Засгийн газрын гишүүн, Гэр бүл, хөдөлмөр, нийгмийн хамгааллын сайд Л.Энх-Амгалан Хот, тосгоны эрх зүйн байдлын тухай хууль /Шинэчилсэн найруулга/-д өөрчлөлт оруулах тухай хуулийн төслийг өргөн барилаа.

Энэхүү хуулийн төсөл нь 2026 оны нэгдүгээр сарын 1-нээс хэрэгжихээр заасан Хот, тосгоны эрх зүйн байдлын тухай хууль, түүнд дагаж мөрдөх журмын тухай хууль, мөн “Хот байгуулах тухай” Улсын Их Хурлын 2024 оны 72 дугаар тогтоолын хэрэгжилтийг нэг жилээр хойшлуулж, 2027 оны нэгдүгээр сарын 1-нээс хэрэгжүүлэхээр тусгажээ.

2024 оны 72 дугаар тогтоолоор Дархан, Эрдэнэт, Зуунмод, Хархорум, Багануур, Налайх зэрэг улсын зэрэглэлтэй зургаан хот, орон нутгийн зэрэглэлтэй 43 хот, дагуул дөрвөн хот шинээр байгуулахаар шийдвэрлэсэн. Мөн хотуудын эдэлбэр газрын хэмжээ, заагийг тогтоох, өмч хөрөнгө, төсөв, байгууллагын бүтэц, орон тоог хууль тогтоомжийн дагуу шилжүүлэх үүргийг Засгийн газарт өгсөн юм.

Гэвч эдгээр зохицуулалтыг хэрэгжүүлэхэд шаардлагатай зохион байгуулалтын ажил, орон нутагтай зөвшилцөх процесс, өмч хөрөнгийн шилжилт зэрэг асуудлыг бүрэн шийдвэрлэхэд хугацаа шаардагдаж байгаа тул хууль хэрэгжих хугацааг хойшлуулах зайлшгүй нөхцөл үүссэн байна.

Иймд энэхүү хуулийн төсөлд дээрх хугацааг нэг жилээр хойшлуулах, мөн ирэх хугацаанд шаардлагатай арга хэмжээг зохион байгуулах талаар нарийвчилсан зохицуулалт тусгасныг УИХ-ын Хэвлэл мэдээллийн газраас мэдээлэв.

Эх сурвалж: Улсын Их Хурлын Хэвлэл мэдээллийн газар