Монгол Улсын Ерөнхийлөгч У.Хүрэлсүх өнөөдөр олон нийтийн зүгээс огт хүлээгээгүй байсан гэнэтийн цочир мэдэгдэл хийлээ.
Тодруулбал, сүүлийн өдрүүдэд хотын дарга асан Х.Нямбаатар болон “Бодь интернэшнл” группийн гүйцэтгэх захирал асан А.Амундра нараас мэдэгдэл хийж, олны анхааралд оруулсан 110 сая ам.долларын авлигын хэрэгт холбогдолгүй болохоо нотлохын тулд Ерөнхийлөгчийн үүрэгт ажлаа хүлээлгэж өгөх болсноо өнөөдөр /2026.11.17/ албан ёсоор мэдэгдэв.
У.Хүрэлсүх:
-“Сүүлийн нэг сар гаруйн хугацаанд Монгол Улсын Ерөнхийлөгчийн нэр төр, Ерөнхийлөгчийн институц рүү зарим нэг гэмт бүлэглэлийнхэн эрээ цээрээ алдсан довтолгоо хийж, Ерөнхийлөгчийн нэр хүнд, ард түмний нэр хүндийг гутаан доромжилсон үйл явдал болж байна.
АН-ын бүлэг хуралдаж, Монгол Улсын Ерөнхийлөгч үүрэгт ажлаа өгөөд үнэн мөнийг тогтоолгох нь зүйтэй гэсэн шаардлага гаргасан. Үүнтэй би санал нэг байгаа. Төрийн тэргүүн үүрэгт ажлаа өгөөд үнэн худлыг тогтоолгох нь шударга ёсонд нийцнэ гэж үзэж байгаа.
Тиймээс Монгол Улсын Ерөнхийлөгчийн эрхэм хүндтэй үүрэгт ажлаа хүлээлгэж өгнө. Миний нэр хүндийг гутаан доромжилж байгаа этгээдүүдийг холбогдох байгууллагад нь өгч, нэр төрөө сэргээлгэнэ" гэв.
Үүний тулд Ерөнхийлөгч У.Хүрэлсүх чөлөөлөгдөх хүсэлтээ өнөөдөр албан ёсоор УИХ-д хүргүүлнэ. Уг асуудлыг УИХ-ын Төрийн байгуулалтын байнгын хороо маргааш хуралдаж хэлэлцэх бөгөөд УИХ энэ пүрэв гаригийн /2026.11.19/ -ийн нэгдсэн хуралдаанаар хэлэлцэх юм байна.
УИХ-ын чуулганы хуралдааны дэгийн тухай хуульд зааснаар Монгол Улсын Ерөнхийлөгчийн үүрэгт ажлаас чөлөөлөгдөх хүсэлтийг УИХ-ын чуулганы нэгдсэн хуралдаанд оролцсон гишүүдийн олонх буюу 50-иас дээш хувь дэмжсэнээр хүлээн авч шийдвэрлэнэ.
Чуулганд оролцсон гишүүдийн олонхи дэмжээгүй тохиолдолд Ерөнхийлөгч үүрэгт ажлаа үргэлжлүүлэн хийх юм.



