Увс аймгийн Өндөрхангай сумын харьяат, Дархан спорт хорооны бөх, спортын мастер, аймгийн заан Ц.Гонгор агсны нэрэмжит U-20 хүртэлх насны үндэсний бөхийн УАШТ "Дархан Юнайтед Арена" цогцолборт гурван өдрийн турш үргэлжилж, шилдгүүдээ тодрууллаа.
Аймгийн заан Ц.Гонгор агсны нэрэмжит тус тэмцээнийг түүний гэр бүл, үр хүүхдүүд 11 дэх жилдээ уламжлал болгон зохион байгуулж байна. Энэ удаагийн тэмцээнд аймаг, сумын цолтой болон залуу 70 орчим бөх оролцож, тойргийн журмаар барилдан аваргуудаа тодруулсан юм.
Арван тойргийн барилдааны нийлбэр дүнгээр Дархан-Уул аймгийн Хонгор сумын харьяат, үндэсний бөхийн улсын хошой аварга, аймгийн заан Р.Омар түрүүлж, алтан медаль хүртлээ. Харин Өмнөговь аймгийн Ноён сумын харьяат, “Алдар” спорт хорооны бөх, сумын заан О.Сумьяабазар мөнгө, Завхан аймгийн Эрдэнэхайрхан сумын харьяат, “Эв Монгол” клубийн бөх, аймгийн заан Д.Нарантулга хүрэл медалийн эзэн болов.
Тэмцээний уламжлал ёсоор шилдэг 10 бөхийг шалгаруулан шагнаж урамшуулсан бөгөөд дөрөвдүгээр байрт Архангай аймгийн Цэнхэр сумын харьяат, “Алдар” спорт хорооны бөх, сумын заан Ц.Насанбаатар шалгарлаа.
Мөн Говьсүмбэр аймгийн Сүмбэр сумын харьяат, “Алдар” спорт хорооны бөх, сумын заан Б.Батбилгүүн, Хөвсгөл аймгийн Галт сумын харьяат, “Алдар” спорт хорооны бөх, сумын заан Ч.Галбадрах, Баян-Өлгий аймгийн Алтай сумын харьяат, “Алдар” спорт хорооны бөх, сумын заан Н.Амартүвшин, Хөвсгөл аймгийн Рашаант сумын харьяат, “Аварга” дээд сургуулийн бөх, сумын заан Г.Лхагвадорж, Баян-Өлгий аймгийн Сагсай сумын харьяат, “Алдар” спорт хорооны бөх, сумын заан Е.Ховланд, Архангай аймгийн Цэнхэр сумын харьяат, “Алдар” спорт хорооны залуу бөх Д.Доржготов нар шилдэг 10 бөхөөр шалгарчээ.

Уран барилдааны шагналыг Говь-Алтай аймгийн Алтай сумын харьяат, “Алдар” спорт хорооны бөх сумын заан У.Мөнгөншагай, Өсөх ирээдүйтэй бөхийн шагналыг Увс аймгийн Хяргас сумын харьяат, “Хурд” дэвжээний бөх сумын заан Д.Мөнх-Отгон нар хүртлээ.
Багийн нийлбэр дүнгээр Улсын харцага Б.Одгэрэл дасгалжуулагчтай Зэвсэгт хүчний “Алдар” спорт хороо тэргүүн байр, аймгийн арслан Б.Сүхбаатар дасгалжуулагчтай “Дархан БТСГ” мөнгөн медаль, МУГД Улсын начин Б.Адъяахүү дасгалжуулагчтай “Эв Монгол” клуб хүрэл медалийн эздээр тус тус шалгарлаа.

U-20 хүртэлх насны үндэсний бөхийн УАШТ-ийг МУГТ, Улсын дархан аварга Н.Батсуурь, МУГТ Улсын аварга Ч.Санжаадамба, МУГТ, Улсын аварга С.Мөнхбат нар хүрэлцэн ирж үзэж сонирхон, залуус дүү нартаа амжилт хүсэж урам өгсөн юм.




