Милан дахь Прада сангийн соёлын төвд "Эртний ертөнцийн өв. Афро-Евразийн орон зай дахь соёлын уулзвар (МЭӨ 800-МЭ 800)" олон улсын судалгааны үзэсгэлэн зохион байгуулагдаж байна.

Үзэсгэлэнгийн нээлтийн ёслолд "Чингис хаан" Үндэсний музейн захирал С.Чулуун оролцов. 

Үзэсгэлэнд 80 орчим байгууллагын цуглуулгаас 200 гаруй үзмэр, түүх, соёлын өвийн эд зүйлсийг дэлгэн үзүүлж байна. Үүнд Чингис хааны үндэсний музей, Монголын Шинжлэх ухааны академийн Археологийн хүрээлэнгээс нийлүүлсэн хоёр багц үзмэр, эд өлгийн зүйлс багтжээ. 

Энэхүү үзэсгэлэн нь хүн төрөлхтний цаашдын хөгжилд шийдвэрлэх нөлөө үзүүлсэн эртний үеийн Газар дундын тэнгисийн бүс нутаг, Зүүн Африк, Азийн соёл иргэншлийн харилцаа холбоо, харилцан нөлөөллийг шинэ бөгөөд гэнэтийн өнцгөөс харуулах зорилготой юм. 

Үзэсгэлэнд тавигдсан бүтээлүүд нь өвөрмөц олон янз байдал, уран сайхны болон түүхэн үнэ цэнээрээ ялгардаг бөгөөд соёл хоорондын солилцоо, харилцан үйлчлэл, өөр өөр соёл иргэншлийн хоорондох түүхэн холбооны олон талт шинж чанарыг илчлэх зорилготой юм.

Энэхүү үзэсгэлэнгийн өвөрмөц байдал нь археологийн олдворуудыг соёлын олон талт, өргөн хүрээтэй сүлжээний хүрээнд танилцуулж, тэдгээрийн нээлтийн нөхцөл байдал, онцлог шинж чанар, соёлын солилцооны цар хүрээ, эрчим, томоохон худалдааны төвүүдэд өөр өөр гарал үүсэлтэй эд зүйлс зэрэгцэн оршиж байсан түүхэн бодит байдлыг онцолсонд оршино.

Энэхүү олон улсын үзэсгэлэнд Монголын музей, судалгааны байгууллагуудын цуглуулгаас үзмэр, түүхэн эд өлгийн зүйлсийг танилцуулж байгаа нь Монголын түүх, археологийн өв, соёлын үнэт зүйлсийг сурталчлах, дэлхийн олон нийтийг тэдгээртэй өргөнөөр танилцуулахад чухал ач холбогдолтой юм.