Нийтийн биеийн тамир, спортыг хөгжүүлэх, иргэдийн эрүүл амьдралын хэв маягийг дэмжих зорилгоор Улаанбаатар хотод зохион байгуулагдах хоёр томоохон арга хэмжээ болох “Дугуйтай Улаанбаатар-2025” өдөрлөг, “Баянзүрх марафон – 2025” гүйлтийн үеэр замын хөдөлгөөнийг хэсэгчлэн хязгаарлахаар боллоо. Арга хэмжээ тавдугаар сарын 10-ны Бямба гарагт явагдана.
“Дугуйтай Улаанбаатар-2025” өдөрлөгийн хүрээнд дугуйчдын уралдаан, парад, дугуйн клубуудын танилцуулга, хэрэгсэл, тоноглолын худалдаа, засвар үйлчилгээ зэрэг өргөн цар хүрээтэй үйл ажиллагаа Сүхбаатарын талбайд 06:00-13:00 цагийн хооронд болох бөгөөд 20 км-ийн уралдаан 06:00-18:00 цагт зохион байгуулагдана.
Дараах чиглэлд замын хөдөлгөөнийг хэсэгчлэн хязгаарлана:
-
Сүхбаатар дүүрэг: Соёлын төв өргөөнөөс Төв шуудан хүртэл Энхтайваны өргөн чөлөөгөөр.
-
Чингэлтэй дүүрэг: Цэцэг төв хүртэл Энхтайваны өргөн чөлөө, Зоос гоёлын уулзвар.
-
Баянзүрх дүүрэг: И-Март – Монгол бөхийн өргөө хүртэл Токиогийн гудамж.
-
Нэмэлт замууд: МУИС-ийн I байр, Чингис хааны музей, Метромолл их дэлгүүр, Новотел зочид буудал хүртэл чиглэлийн бүх уулзварууд.
Мөн “Баянзүрх марафон – 2025” гүйлтийн уралдаан 07:00-14:00 цагт Баянзүрх дүүргийн “Дүнжингарав” худалдааны төвөөс Төмөр замын гарам, Гачууртын зам хүртэлх чиглэлд зохион байгуулагдаж, замын хөдөлгөөнд өөрчлөлт орох тул жолооч, иргэдийг анхаарал болгоомжтой зорчихыг сануулж байна.
Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс.
