Нийслэлийн Засаг даргын “Орчны аюулгүй байдлыг хангах арга хэмжээ зохион байгуулах тухай” болон “Эзэнгүй нохой, муурыг түр байрлуулан асрамжлах газрын ашиглалтын зардлыг шийдвэрлэх тухай” захирамжуудын хүрээнд Хан-Уул дүүргийн 13 дугаар хорооны нутаг дэвсгэрт эзэнгүй нохой, муурыг түр хугацаагаар байршуулан асрах байр байгуулж, үйл ажиллагааг нь эхлүүлээд байна.
Энэхүү арга хэмжээ нь иргэдийн эрүүл, аюулгүй орчинд амьдрах нөхцөлийг бүрдүүлэх, эзэнгүй амьтдын тоог бууруулах зорилготой юм. Үүний хүрээнд мэргэжлийн байгууллагын албан хаагчид бүсчилсэн байдлаар ажиллаж, хуваарийн дагуу эзэнгүй нохой, муур барих ажлыг шат дараатай зохион байгуулж байна.
2025 оны тавдугаар сарын 6-ны өдрийн байдлаар тус асрах байранд нийт 98 нохой, 33 муур байршуулжээ. Эдгээр амьтдад мал эмнэлгийн үзлэг хийж, дараах халдварт өвчнөөс урьдчилан сэргийлэх тарилгад хамруулсан байна. Үүнд:
-
Нохойн гударга
-
Халдварт гепатит
-
Парвовирус
-
Параинфлюнза
-
Лептоспироз
Цаашид энэхүү ажил нийслэлийн бусад дүүрэгт үргэлжлэхээр төлөвлөгдөж, орчны аюулгүй байдал, хүн-амьтны харилцааны эрүүл тэнцвэрт орчныг бүрдүүлэхэд чиглэж байна.
Эх сурвалж: Нийслэлийн Захирагчийн ажлын алба
