Булган аймгийн Хүүхэд, гэр бүлийн хөгжил, хамгааллын газар (ХГБХХГ) үүсэж хөгжсөний 100 жилийн ой тохиож байна. Энэхүү түүхт ойн хүрээнд тус байгууллагын хамт олон “Булганы индэр” сэтгүүлийн тусгай дугаарыг хэвлүүлж, өнгөрсөн зуун жилийн хугацаанд бүтээсэн амжилт, бүтээн байгуулалт, түүхэн үйл явдлуудаа олон нийтэд толилуулсан нь уншигчдын сонирхлыг ихээр татаж байна.

1925 онд Богд хан уулын аймгийн Булган хан уулын хошууны Тамгын толгой хэмээх газар “Тамгын бага сургууль” нэртэйгээр хоёр багш, хорин сурагчтай үйл ажиллагаагаа эхлүүлсэн нь өнөөдрийн ХГБХХГ-ын үндэс суурь болсон билээ. Тэр цагаас хойш тус байгууллага үе үеийн хүүхэд, өсвөр үеийнхний хүмүүжил, боловсрол, хөгжлийн төлөө амжилттай ажиллаж ирсэн түүхтэй.

Ойн баярын хүрээнд хөдөлмөр зүтгэл, амжилт бүтээлээрээ манлайлагч эрхмүүд Төрийн дээд одон, медалиар шагнагдлаа.

• Хөдөлмөрийн гавьяаны улаан тугийн одонгоор Булган аймгийн Хүүхдийн номын сангийн ахмад ажилтан Ж.Ирина шагнагдлаа.

• Хөдөлмөрийн хүндэт медалиар Булган аймгийн ХГБХХГ-ын дарга асан Т.Баярбат,

• Булган аймгийн ХГБХХГ-ын даргын үүргийг түр орлон гүйцэтгэгч С.Оюунзаяа,

• Ахлах мэргэжилтэн Г.Одончимэг, Н.Баянжаргал нар шагнуулж, төр засгийн өндөр үнэлгээг хүртлээ.

Өнөөдрийн байдлаар Булган аймгийн 16 сум, 1 тосгон, аймгийн төвийн баг бүрд хүүхэд, гэр бүлийн нийгмийн ажилтантай болж, орон нутгийн хэмжээнд хүүхэд хамгааллын бодлого, үйл ажиллагаа тогтвортой хэрэгжиж байна.

Тус байгууллага 2024 онд гэр бүлийн хүчирхийллийн хохирогчийн аюулгүй байдлыг хангах Түр хамгаалах байр ашиглалтад оруулж, 10 жилийн дараа Жаргалант зуслан дахин үйл ажиллагаагаа эхлүүлсэн зэрэг олон чухал ажлуудыг хэрэгжүүлээд байна.

Эх сурвалж: Булган аймгийн Хүүхэд, гэр бүлийн хөгжил, хамгааллын газар