Европын Холбоо 2027 оны эцэст ОХУ-аас байгалийн хий авахаа бүрэн зогсоох төлөвлөгөөг энэ долоо хоногт танилцуулсан ч Словак Улс уг төлөвлөгөөг эрс эсэргүүцэж буйгаа илэрхийллээ. ЕХ аливаа шийдвэр гаргахдаа гишүүн 27 улсын бүгдийнх нь зөвшөөрлийг шаарддаг тул энэ асуудалд Словакын байр суурь чухалд тооцогдож байна.
Словак Улсын Ерөнхий сайд Роберт Фицо Европын Комиссын төлөвлөгөөг хүлээн зөвшөөрөх боломжгүй гэж мэдэгдээд, хэрвээ ЕХ ОХУ-ын байгалийн хийн импортыг зогсоох шийдвэр гаргавал хориг тавихаа илэрхийллээ. Тэрбээр ийм шийдвэр нь зөвхөн Словак бус бүх Европын Холбооны орнуудын байгалийн хийн үнийг огцом өсгөх сөрөг үр дагавартай гэж үзэж байна. Мөн Словак улс 2034 он хүртэл ОХУ-ын байгалийн хийг нутаг дэвсгэрээрээ дамжуулах гэрээтэй бөгөөд уг гэрээг цуцлах тохиолдолд үүсэх хохирлыг нөхөн төлүүлэх арга хэмжээ авна гэдгээ дурдсан байна.
Ерөнхий сайд Роберт Фицо мөн ОХУ-аас газрын тос, цөмийн эрчим хүч импортлохыг хориглох ЕХ-ны шийдвэрийг эсэргүүцэж байгаа юм. Харин Европын Холбооны зүгээс ОХУ-ын эрчим хүчинд хэт найдах нь баталгаагүй, эрсдэлтэй гэдгийг олон улсын нөхцөл байдал улам бүр баталж байгааг онцолж, ОХУ-аас эрчим хүчний хараат байдлыг бүрэн зогсооно гэсэн байр сууриа хэвээр хадгалж байна.
Европын Комиссын дарга Урсула фон дер Ляейн “Европын эрчим хүчний үнийг хорлон сүйтгэгч хөрш улс тогтоох ёсгүй” хэмээн мэдэгдэж, энэ чиглэлд Европын Холбоо тууштай байх болно гэдгээ илэрхийллээ.
Сэтгэгдэл (1)