Америкийн “Amazon” компанийн хиймэл оюун ухаант туслах болох “Alexa” төхөөрөмжөөс 2025 онд хамгийн их асуусан асуулт нь “AI гэж юу гэсэн үг вэ?” байжээ. Энэхүү төхөөрөмж нь XXI зууны айл өрхүүдэд хөгжим тоглуулах, жорын цаг тохируулах, цаг агаарын урьдчилсан мэдээ авах зэрэгт байнга ашиглагдах болоод байгаа юм. 

Гэхдээ түүний чадвар үүнээс хавьгүй илүү бөгөөд “Alexa”-гийн хязгааргүй мэдлэгт найддаг байнгын хэрэглэгчид нь толгойдоо орж ирсэн бараг бүх бодлоо асууж тодруулдаг. “Amazon”-ы 2025 онд “Alexa”-гаас хамгийн их асуусан асуултууд”-ын тоймд дурдсанаар, Их Британийн хэрэглэгчид AI гэж юу гэсэн үг вэ гэдгийг олон удаа асуусан байна. Ерөнхий мэдлэгтэй холбоотой бусад онцлох асуултуудыг дурдвал, “өндгийг хэр удаан чанах вэ?”, “Дэлхийн диаметр хэд вэ?” зэрэг багтжээ.

Мөн баян чинээлэг, алдартай хүмүүсийн талаарх ерөнхий мэдээлэл, түүнчлэн тэдний хөрөнгө, биеийн өндөр, хамтрагчдын талаарх мэдээлэл нь “Alexa”-гийн хэрэглэгчдийн сонирхлыг ихээхэн татдаг байна. Ерөнхийдөө Их Британийн хэрэглэгчдийн асуусан ихэнх асуултуудаас үзэхэд, тэдний анхаарлыг хамгийн ихээр татсан алдартнууд бол Криштиану Роналду, Тейлор Свифт, Илон Маск нар байжээ.

Гэхдээ биеийн өндрийн талаарх ихэнх асуулт нь Холливүүдийн од Том Крузтай холбоотой байсан бөгөөд түүний дараа Английн хөлбөмбөгчин асан Питер Крауч орсон байна. Харин И.Маск бол хамгийн олон хүн хөрөнгийг нь мэдэхийг хүссэн хүн болсон бөгөөд түүний дараа “YouTube” платформд зориулан бичлэг бүтээгч MrBeast /жинхэнэ нэр нь Жимми Дональдсон/ болон Т.Свифт нар бичигджээ. Мөн И.Маск алдартнуудын эхнэр/нөхрийн талаарх асуултуудад гуравдугаарт бичигдсэн байна. Харин Эд Ширан хэнтэй гэрлэсэн болохыг хэрэглэгчид хамгийн их сонирхсон бол түүний дараа дуучин Род Стюартын талаарх асуултууд жагсжээ.

Харин Т.Свифт бол “Alexa”-гаар уран бүтээл нь хамгийн их эгшиглэсэн уран бүтээлчээр тодорсон бол Бруно Марс, Рөүз нарын “APT” дуу нь хамгийн их тоглогдсон дуугаар шалгарсан байна. Түүнчлэн “Netflix”-ийн супер хит болсон хүүхэлдэйн кино болох “KPop Demon Hunters”-ийн гурван дуу хэрэглэгчдийн хамгийн их сонссон дуунуудын шилдэг 10-т багтжээ.

“Amazon” мөн бусад орнуудад “Alexa”-гаас хамгийн олон удаа асуусан асуултуудын жагсаалтыг гаргасан байна. Ингэхэд “APT” нь Австралид хамгийн их тоглогдсон хит дуу байсан бөгөөд шилдэг 10 дууны зургаа нь “KPop Demon Hunters”-ийн дуунууд байжээ. Мөн австраличууд дуучин Сабрина Карпентер хэр өндөр болохыг, “Stranger Things” цувралын од Финн Вулфхард хэнтэй гэрлэснийг хамгийн их сонирхож байсан /Вулфхард гэрлээгүй/ бол олны танил хүмүүсээс Т.Свифт, К.Роналду, MrBeast нарын талаар хамгийн их асуужээ.  

Ерөнхий мэдлэгийн тухайд гэвэл, австраличуудын хамгийн их асуусан асуулт нь “хэрхэн унтах вэ”, “Рубикийн шоог хэрхэн эвлүүлэх вэ” зэрэг байлаа. Харин Ирландад хамгийн их сонирхсон асуултууд нь “биткоины үнэ хэд байна?”, “Дональд Трамп хэдэн настай вэ?” зэрэг байсан гэнэ. Мөн Ирландын хэрэглэгчдийн хамгийн их сонирхсон алдартнууд бол К.Роналду, Т.Свифт, Лионел Месси нар байжээ.

Эх сурвалж: CNN