Энэ оны есдүгээр сард Ерөнхий сайд Шарма Олиг огцроход хүргэсэн авлигын эсрэг жагсаал нь Балбын 42 тэрбум ам.долларын эдийн засагт 586 сая гаруй ам.долларын хохирол учруулсан гэж тус улсын Засгийн газраас баасан гарагт гаргасан мэдэгдэлд дурджээ. 

Эсэргүүцлийн жагсаал болон түүнээс үүдэлтэй үймээн самууны улмаас гурван сарын өмнө 77 хүн амиа алдаж, 2000 гаруй хүн гэмтэж бэртсэн юм. Жагсаалын үеэр Сингха Дурбарын цогцолбор, Ерөнхий сайдын өргөө, Дээд шүүх, парламентын ордон, улстөрчдийн хувийн орон сууц, зарим улстөрчийн ойр дотны хүмүүсийн эзэмшдэг бизнесийн цогцолбор зэрэг төрийн болон хувийн дэд бүтцийг шатааж сүйтгэжээ.

Ш.Олигийн халааг авсан Ерөнхий шүүгч асан, түр Ерөнхий сайд Сушила Каркигийн ажлын албанаас гаргасан мэдэгдэлд дурдсанаар, хохирлыг үнэлэх албан ёсны хороо сэргээн босголтын зардал 252 сая ам.доллароос давна гэж тооцоолсон байна. Түр засгийн газар сэргээн босголтын ажилд зориулж нөөцийг дайчлах албан ёсны сан байгуулсан бөгөөд одоогоор олон нийт болон байгууллагуудаас 1 сая орчим ам.доллар цугларсан гэж эрх баригчид мэдэгджээ.

Засгийн газар сэргээн босголтод шаардлагатай хөрөнгө мөнгөний зөрүүг хэрхэн нөхөхөөр төлөвлөж байгаагаа дурдаагүй байна. Дэд бүтцийг сэргээн босгох асуудал хариуцсан Хот байгуулалтын яамны ахлах инженер Чакрабарти Кантагийн хэлснээр, Сингха Дурбар, ерөнхийлөгчийн ордон, Дээд шүүх болон гол яамдын сэргээн босголтын ажил хэдийн эхэлжээ.

Түүнчлэн тодорхой хэсэг нь эвдэрч сүйдсэн зарим барилгын засвар хэдийн дууссан бөгөөд бүрэн эвдэрч сүйдсэн бусад барилгын нарийвчилсан тайлан, зураг төсөл бэлэн болмогц сэргээн босгох ажил эхэлнэ” гэж Ч.Канта “Reuters” агентлагт мэдээлсэн байна.

Түр засгийн газар 2026 оны гуравдугаар сарын 5-нд парламентын сонгууль явуулахаар товлоод байгаа юм.

Эх сурвалж: Reuters