Улсын Их Хурлын дарга Н.Учралд өнөөдөр Н.Алтаншагай, Л.Мөнхбаясгалан, Л.Соронзонболд нарын хорин нэгэн гишүүн “Гадаад зээллэгийн ашиглалт, үр ашгийг нэмэгдүүлэх тухай” анхдагч хуулийн төслийг өргөн мэдүүллээ. Хуулийн төсөл санаачлагчдын мэдээлснээр Засгийн газрын шугамаар гэрээ байгуулж, УИХ-аас соёрхон баталсан хэрэгжиж буй гадаад зээл, тусламжийн нийт нэг зуун арван зургаан төсөл байгаагаас гадаад төслийн зээлийн наян есөн төсөл нь одоогоор хэрэгжиж байна. Эдгээр төслийн зээлийн ашиглагдаагүй үлдэгдэл нь арван дөрвөн их наяд таван зуун тэрбум төгрөгт хүрсэн бөгөөд гадаад зээлийн гэрээний ихэнх нь хоёр мянга гучин он гэхэд дуусахаар байгаа аж.

Гэвч зээлийн ашиглалтын хэмжээ хангалттай түвшинд батлагдахгүй байгаагаас шалтгаалан төслүүдийн хэрэгжилт удааширч, бодлогын өөрчлөлт хийхгүй тохиолдолд зарим төсөл арван жилээс дээш хугацаанд хэрэгжих эрсдэл бодитоор үүсээд байгааг онцолжээ. Иймд нэн хөнгөлөлттэй, хөнгөлөлттэй болон энгийн нөхцөлтэй гадаад зээллэгийн эх үүсвэрээр хэрэгжүүлэх төслүүдийн санхүүжилтийг гэрээ, хэлэлцээрт заасан хугацаанд үр ашигтай ашиглаж, төслийг бүрэн ашиглалтад оруулах эрх зүйн таатай орчныг бүрдүүлэх зорилгоор уг хуулийн төслийг боловсруулсан байна.

Мөн үндэсний аюулгүй байдлыг хангах, Засгийн газрын хоёр мянга хорин дөрөвөөс хоёр мянга хорин найман оны үйл ажиллагааны хөтөлбөрт туссан, арван дөрвөн мега төслийн жагсаалтад багтсан, импортыг орлож, үйл ажиллагааны орлогоороо зардлаа нөхөх чадамжтай, нийгэм, эдийн засгийн өндөр ач холбогдолтой Газрын тос боловсруулах үйлдвэр, Эрдэнэбүрэнгийн усан цахилгаан станц, Сэлбэ дэд төвд түшиглэсэн гэр хорооллыг орон сууцжуулах төслүүдийн санхүүжилт төсвийн зардал, тэнцлийн хязгаарыг давах эрсдэлтэй байгаа нь төслүүдийг зогсонги байдалд оруулж байгааг дурдсан байна. Үүнтэй холбоотойгоор зөвхөн эдгээр төслийн гадаад зээлийн санхүүжилтийн ашиглалтын зардлыг тухайн жилийн дунд хугацааны төсвийн хүрээний мэдэгдлийн зарим үзүүлэлтэд уян хатан байдлаар тооцох зохицуулалтыг хуулийн төсөлд тусгажээ.

Хуулийн төсөл батлагдсанаар стратегийн гол бүтээгдэхүүний импортын хэт хамаарал буурч, валютын гадагшлах урсгал багасах, УИХ-аас соёрхон баталсан зээлийн гэрээ, хэлэлцээрийн хэрэгжилт хангагдах, олон улсын хөгжлийн түншүүдийн өмнө хүлээсэн үүргээ биелүүлэх боломж бүрдэхийн зэрэгцээ төсөвт ирэх зээлийн дарамт буурч, нийгэм, эдийн засгийн тогтвортой хөгжил, Монгол Улсын зээлжих зэрэглэлд эерэг нөлөө үзүүлнэ гэж тооцоолжээ.

Эх сурвалж: Улсын Их Хурлын Хэвлэл мэдээллийн газар