Хятадын “зөвшөөрөл бүхий үйлчлүүлэгчдэд” дэвшилтэт H200 чипийг худалдаалахыг Америкийн чип үйлдвэрлэгч “Nvidia” компанид зөвшөөрнө гэж АНУ-ын Ерөнхийлөгч Дональд Трамп мэдэгджээ.

“Бид үндэсний аюулгүй байдлаа хамгаалахын зэрэгцээ Америкт ажлын байр бий болгож, хиймэл оюун ухааны салбарт тэргүүлж буй Америкийн байр суурийг хадгалах болно” гэж Д.Трамп даваа гарагт нийгмийн сүлжээний хуудсаараа дамжуулан мэдэгдсэн байна.

Энэхүү шийдвэр нь “AMD” зэрэг Америкийн бусад чип үйлдвэрлэгч компаниудад мөн хамаарах бөгөөд өнгөрсөн долоо хоногт Вашингтоноос дэмжлэг авахаар ирсэн “Nvidia”-гийн тэргүүн Женсен Хуан томоохон лобби хийсний дараа уг шийдвэрийг гаргажээ.

Чип үйлдвэрлэгч хамгийн үнэ цэнтэй компани болох “Nvidia” сүүлийн саруудад АНУ, Хятадын геополитикийн сөргөлдөөний төвд байгаа бөгөөд тус компанийн хамгийн дэвшилтэт чипийг Хятадад худалдаалахыг хориглоод байв.

Д.Трамп энэ оны долоодугаар сард чип худалдахад тавьсан хоригийг цуцалсны сацуу Хятадад олсон орлогынхоо 15 хувийг АНУ-ын Засгийн газарт өгөхийг “Nvidia” компаниас шаардсан байна. Дараа нь Бээжин технологийн компаниуддаа Хятадын зах зээлд ашиглахаар үйлдвэрлэсэн “Nvidia” чипийг худалдаж авахаа зогсоохыг тушаасан гэх мэдээлэл гарч байв.

“Бид Америкийн чипийн үйлдвэрлэлд Америкт өндөр цалинтай ажлын байр, үйлдвэрлэлийг дэмжих нөхцөлийг бүрдүүлж буй Ерөнхийлөгч Трампын шийдвэрийг сайшааж байна” гэж “Nvidia” компаниас BBC телевизэд өгсөн мэдэгдэлд дурджээ. “Nvidia”-гийн H200 нь дэлхийн хамгийн дэвшилтэт хиймэл оюун ухааны хагас дамжуулагч гэгддэг “Blackwell” чипийн араас ордог.

“Nvidia” даваа гарагт Д.Трампын мэдэгдлийг сайшаажээ. “Худалдааны яамнаас шалгасан, холбогдох зөвшөөрөл бүхий хэрэглэгчдэд H200 чипийг санал болгох нь Америкийн хувьд зөв зүйтэй шийдвэр болж байна” гэж “Nvidia”-гийн мэдэгдэлд дурджээ. Энэ мэдээ цацагдсаны дараа тус компанийн хувьцааны ханш бага зэрэг өссөн байна.

Эх сурвалж: BBC