Улсын Их Хурлын дарга Д.Амарбаясгаланд өнөөдөр Гэр бүл, хөдөлмөр, нийгмийн хамгааллын сайд Л.Энх-Амгалан Хот, тосгоны эрх зүйн байдлын тухай хууль /Шинэчилсэн найруулга/-д өөрчлөлт оруулах тухай хуулийн төслийг өргөн барилаа. Энэ нь хуулийн хэрэгжилтийг нэг жилээр хойшлуулахтай холбоотой юм.

2024 оны 72 дугаар тогтоолоор Дархан, Эрдэнэт, Зуунмод, Хархорум, Багануур, Налайх зэрэг улсын зэрэглэлтэй зургаан хот, орон нутгийн зэрэглэлтэй 43 хот, дагуул дөрвөн хот шинээр байгуулахаар шийдвэрлэсэн. Мөн тогтоолын хүрээнд хотуудын эдэлбэр газрын хэмжээ, заагийг тогтоох, өмч хөрөнгө, төсөв, байгууллагын бүтэц, орон тоог холбогдох хотуудад шилжүүлэх ажлыг Засгийн газарт даалгасан юм.

Гэвч хот байгуулалттай холбоотой эдгээр асуудлыг бүрэн шийдвэрлэх, орон нутагтай зөвшилцөх, өмч хөрөнгийн шилжилт, төсвийн зохицуулалт зэрэгт тодорхой хугацаа шаардлагатай болсон тул хуулийн хэрэгжих хугацааг нэг жилээр хойшлуулах зайлшгүй нөхцөл үүссэн байна. Иймээс уг хуулийн төслийг боловсруулж, Улсын Их Хуралд өргөн мэдүүлжээ.

Энэхүү хуулийн төслийг баталснаар 2026 оны нэгдүгээр сарын 1-нээс хэрэгжихээр заасан Хот, тосгоны эрх зүйн байдлын тухай хууль, дагалдах журам, Улсын Их Хурлын тогтоолын хэрэгжилтийг 2027 оны нэгдүгээр сарын 1 хүртэл хойшлуулна.

Эх сурвалж: УИХ-ын Хэвлэл мэдээллийн газар