Их Британийн Дотоод хэргийн сайд Шабана Махмуд цагаачлалын шинэчлэл хийх төлөвлөгөөгөө парламентад танилцуулжээ. Энэ тухай ВВС мэдээлснийг Kazinform агентлаг дамжууллаа.
Төлөвлөгөөнд тусгаснаар, хууль ёсны цагаачид байнга оршин суух эрх авах өргөдлөө өгөхийн тулд тус улсад 10-аас доошгүй жил амьдарсан байх ёстой. Харин одоогийн хуульд 5-аас доошгүй жил гэж заажээ. Тэгэхээр хууль бус цагаачид болон дүрвэгсэд өргөдлөө өгөхийн тулд 20 жил, тэр ч байтугай 30 жил хүлээх шаардлагатай болж байна.
Их Британид байнга оршин суух эрх нь /ILR, indefinite leave to remain/ тус улсад хугацаагүйгээр амьдрах, ажиллах, сурах, бүх төрлийн тэтгэмж авах, нийгмийн зорилтот бүлэгт зориулсан орон сууцанд хамрагдах боломжийг олгодог.
Шинэ журмын дагуу ILR эрх авахаар өргөдөл гаргах хамгийн доод хугацаа 10 жил болж байна. Гэхдээ жилд гар дээрээ 50 мянгаас дээш фунт стерлинг /сард 3293 фунт стерлинг буюу 4419 доллар/ авдаг цагаач иргэд ILR-ийн өргөдлөө 5 жилийн дараа гаргах боломжтой хэвээр байгаа бол жилд 125 мянгаас дээш фунт стерлинг авдаг цагаачид 3 жилийн дараа өргөдөл гаргах эрхтэй.
Хэрвээ цагаач иргэн тодорхой төрлийн тэтгэмж авдаг, эсвэл визийн журмыг зөрчсөн бол өргөдлөө гаргах хүртэлх хугацаа 20 жил хүртэл уртсах магадлалтай. Мөн ажил хийдэггүй, сурдаггүй хууль бус цагаачдын хувьд энэ хугацаа 30 жил болно.
Сайдын хэлснээр, шинэ журам гарснаар цагаачдад тэтгэмж байдлаар олгож буй олон тэрбум фунт стерлингийг хэмнэх ажээ. Тэрбээр өнгөрсөн онд мэдэгдэхдээ, 2021-2024 онд хууль ёсны цагаачлалаас улбаатайгаар тус улсын хүн ам 2,6 саяар өссөн гэж байв.
Kazinform
