Дорноговь аймгийн “Хутагтын хурд” морин спорт, уяачдын холбооноос хурдан морины цоллоочдын уламжлалт өвийг түгээн дэлгэрүүлэх зорилготой уралдааныг анх удаа зохион байгууллаа.

Соёлын биет бус өвийг хойч үедээ өвлүүлэх, сурталчлах, түгээн дэлгэрүүлэх, хурдан морины цоллоочдын өвлөн суралцагсдыг нэмэгдүүлэх зорилготой уралдаанд гурван аймгийн есөн сумаас 40 гаруй цоллооч гурван насны ангилалд оролцжээ.

Уралдааны 8-12 насны ангилалд тэргүүн байрт Дорноговь аймгийн Алтанширээ сумын Ууганбаярын Мягмарсүрэн, 13-17 насны ангилалд тэргүүн байрт Дорноговь аймгийн Сайншанд сум Амарсайханы Балдорж, 18-аас дээш насны ангилалд тэргүүн байрт Дорноговь аймгийн Эрдэнэ сумын Эрдэнэзулын Ганбаяр тус тус шалгарав.

Хурдан морь цоллооч уралдааныг анх удаа зохион байгуулсан нь Монголын өв соёл, хурдан морины цол дуудах уламжлалт соёлыг түгээн дэлгэрүүлэх, өвлөн уламжлагчдыг тодруулах, хүүхэд залуусын авьяас чадварыг хөгжүүлэхэд томоохон хувь нэмэр оруулж байна хэмээн зохион байгуулагчдын төлөөлөл онцолжээ.

Дорноговь аймгийн хувьд говь хээр талыг хосолсон уур амьсгалтай. Хурдан морийг цоллох соёлд бусад нутгаас ялгарах онцлог байх боломжтой. Гэхдээ ялгаа нь цол дуудах үндсэн хэв маягт бус, харин говийн нутгийн аялгуу, уртын дуу, үгийн сонголт, магтаалын найруулга, нутгийн түүх соёлтой холбогдож илэрдэг болохыг уралдаанд оролцогчдын  төлөөлөл онцолсон байна

Тус аймагт морины цол дуудах соёлын биет бус өвийг тодорхой хэмжээгээр хадгалж үлдсэн залуу, дунд, ахмад настныг хамарсан 50 орчим хүн байдаг бөгөөд үүнээс гадна шинээр өвлөн уламжилж байгаа хүүхэд залуус ч бий аж. Соёлын биет бус өвийн эх хэл, аман уламжлалт илэрхийллүүд, үндэсний уламжлалт баяр ёслол, тоглоом наадгай, уриа дуудлага ай савын хурдан морь цоллох, цол дуудах өв нь зарим үед мартагдах шахсан, хойч үедээ өвлүүлэн уламжлах шаардлагатай соёлын нэг хэлбэр юм. Энэхүү уралдааныг зохион байгуулахад аймгийн ИТХ-аас санхүүгийн дэмжлэг үзүүлсэн байна.