Төлбөрийн тэнцлийн урсгал данс энэ оны эхний хагас жилд 207.2 сая ам.долларын ашигтай гарч, ашиг өмнөх оны мөн үеийнхээс 2 тэрбум ам.доллароор нэмэгджээ.

Үндэсний статистикийн хорооны мэдээлснээр, урсгал дансны ашиг өсөхөд барааны худалдааны ашиг өнгөрсөн оны мөн үеийнхээс 3.8 тэрбум ам.доллар буюу 6.3 дахин нэмэгдсэн нь нөлөөлсөн байна. Харин үйлчилгээний данс 1.7 тэрбум ам.долларын алдагдалтай гарч, энэ нь өнгөрсөн оны мөн үеийнхээс 24.2 хувь буюу 340.3 сая, анхдагч орлогын данс 2.7 тэрбум ам.долларын алдагдалтай гарч, алдагдал 1.5 тэрбум ам.доллар буюу 2.2 дахин нэмэгдсэн байна.

Үйлчилгээний худалдааны орлого дээрх хугацаанд 930.4 сая ам.долларт хүрч өнгөрсөн оны мөн үеийнхээс 21.5 хувь буюу 164.6 сая ам.доллароор нэмэгдэхэд тээврийн үйлчилгээний орлого 8.8 хувь буюу 27.8 сая, аяллын орлого 4.4 хувь буюу 11.9 сая, бусад үйлчилгээний орлого 68.7 хувь буюу 125 сая ам доллароор нэмэгдсэн нь нөлөөлжээ. Үүний 36.8 хувийг тээвэр, 30.2 хувийг аялал жуулчлал, 33 хувийг бусад үйлчилгээний орлого эзэлж байна.

Үйлчилгээний зардал 2.7 тэрбум ам.доллар болж, өнгөрсөн оны мөн үеийнхээс 23.2 хувь буюу 505 сая ам.доллароор нэмэгдэхэд тээврийн зардал 11.2 хувь буюу 76.3 сая, аяллын зардал 7.2 хувь буюу 57.7 сая, бусад үйлчилгээний зардал 53.6 хувь буву 371 сая ам.доллароор өссөн нь нөлөөллөө. Үүний 32.1 хувийг аялал, 28.2 хувийг тээвэр, 39.7 хувийг бусад үйлчилгээний зардал эзэлж байна.

Анхдагч орлогын данс 2.7 тэрбум ам.долларын алдагдалтай гарч, энэ нь өнгөрсөн оны мөн үеийнхээс 1.5 тэрбум ам доллароор нэмэгдсэн. Энэ үзүүлэлтэд гадаадын хөрөнгө оруулагчдын орлогын төлбөр 1.6 тэрбум ам.доллар болж, өнгөрсөн оны мөн үеийнхээс 1.5 тэрбум ам.доллароор өссөн нь нөлөөлжээ.

Санхүүгийн дансны тэнцэл хагас жилд 209.3 сая ам.долларын ашигтай гарч, ашиг нь өнгөрсөн оны мөн үеийнхээс 83.4 хувь буюу 1 тэрбум ам.доллароор багасахад бусад хөрөнгө оруулалтын алдагдал 1.3 тэрбум ам.доллароор өссөн нь нөлөөлжээ. Харин шууд хөрөнгө оруулалтын ашиг өнгөрсөн оны мөн үеийнхээс 34.5 хувь буюу 316.3 сая ам.доллароор өслөө. 

Төлбөрийн тэнцэл дээрх хугацаанд 566.6 сая ам.долларын ашигтай гарч, ашиг өнгөрсөн оны мөн үеийнхээс 1 тэрбум ам.доллароор нэмэгджээ.