“Монгол Улсын шүд, эрүү нүүрний салбарын ирээдүйн чиг хандлага” форум ЭМЯ-нд өнөөдөр боллоо.
Форумыг зохион байгуулах бэлтгэл ажлыг хоёр жилийн өмнөөс эхлүүлжээ. Энэ хугацаанд Японы талтай удаа дараа уулзаж, харилцан санал солилцож, хамтын ажиллагааны хүрээнд өнөөдрийн форумыг зохион байгуулах үндэс суурийг тавьжээ. Форумын үр дүн нь Монгол Улсад өвчлөл ихтэй байгаа шүдний цоорлын тархалтыг бууруулахад чиглэсэн зөв зохистой хамтын ажиллагааг бий болгох, цаашлаад бодлогын түвшинд төрийн оролцоог нэмэгдүүлэхэд оршино.
Монгол Улсын Ерөнхийлөгчийн Эрүүл мэнд, нийгмийн бодлогын зөвлөх Б.Бадамцэцэг:
-“Өнөөдрийн байдлаар Монгол Улсад шүдний цоорлын тархалт 71.6 хувьтай байгаа бол зургаан настай хүүхдүүдийн дунд шүд цоорох өвчний тархалт 96 хувиас дээш гарсан үзүүлэлттэй байна. Энэ бол анхаарал татахуйц, ноцтой нөхцөл байдал” хэмээн тодотгов.
Мөн тэрбээр, “Иргэд шүд цоорох өвчнийг эмчлүүлээд эдгэрдэг энгийн өвчин гэж ойлгох нь бий. Гэвч шүдний цоорол нь аажмаар даамжирч, хүний эрүүл мэндэд олон талын сөрөг нөлөөтэй учраас “чимээгүй тахал” гэж хэлж болохуйц томоохон асуудал болоод байна. ДЭМБ-ын шалгуур үзүүлэлтээр шүд цоорлын тархалт 25 хувиас дээш гарахад өндөр түвшинд тооцогддог. Гэтэл Монгол Улсад энэ үзүүлэлт 71.6 хувь байгаа нь асуудал ямар хэмжээнд хүрснийг харуулж байна. Тиймээс шүд, амны хөндийн эрүүл мэндэд онцгой анхаарал хандуулах шаардлагатай. Мөн амны хөндийн өвчлөл нь хүний биеийн ерөнхий эрүүл мэндтэй шууд холбоотойг дэлхий нийтээр хүлээн зөвшөөрч байна. Иймээс хүмүүс шүд, амны хөндийн эрүүл мэнддээ илүү анхаарах шаардлагатай болсон. Японы талтай хамтран ажиллаж буй энэхүү уулзалт, форумын хүрээнд Монгол Улсад өндөр түвшинд байгаа шүдний өвчлөлийн тархалтыг бууруулахад чиглэсэн бодитой, үр дүнтэй хамтын ажиллагааг бий болгох нь чухал. Үүний зэрэгцээ бодлогын түвшинд төрийн оролцоо зайлшгүй шаардлагатай байна. Энэ хүрээнд Шүд, эрүү, нүүрний үндэсний төвийг байгуулахаар ажиллаж байгаа” гэв.
Тус төв байгуулагдсанаар хувийн эмнэлгүүдэд бүрэн эмчлүүлэх боломжгүй тусгай хэрэгцээтэй хүүхэд болон иргэдэд шаардлагатай тусламж, үйлчилгээг үндэсний хэмжээнд үзүүлэх боломж бүрдэх юм. Түүнчлэн шүд, амны хөндийн эрүүл мэндийн чиглэлээр томоохон судалгаа хийх, өвчлөлийн өнөөгийн нөхцөл байдал, цаашдын чиг хандлагыг тодорхойлох, түүнд үндэслэн бодлого боловсруулах үндэсний хэмжээний бүтэц бий болно. Ингэснээр өнөөдөр 96 хувиас дээш түвшинд хүрээд байгаа хүүхдийн шүд цоорлын тархалтыг үе шаттай бууруулахад бодит үр дүн гарна гэж салбарынхан үзэж байна.
Японы шүдний Анти-Эйжинг нийгэмлэгийн удирдах зөвлөлийн гишүүн Ёошишигэ Танигүчи:
-"Монгол Улсад имплантын чиглэлээр эмнэлгийн үйлчилгээ үзүүлж байгаа. Имплант гэдэг нь шүдээ алдсан хүмүүст тухайн шүдийг орлох хиймэл шүдийг суулгах эмчилгээний арга. Монгол хүмүүсийн хувьд 30-35 наснаас хойш арын араа шүднүүдээ алдсан байх тохиолдол нэлээд түгээмэл байдаг. Үүний шалтгаан нь шүд цоорох, шүдний элэгдэл, буйл болон амны хөндийн үрэвсэл зэрэг олон хүчин зүйлтэй холбоотой. Гэхдээ энд хамгийн чухал нь ямар эмчилгээ хийх вэ гэдгээс илүүтэй тухайн шүдийг хэрхэн эрүүл, зөв арчилж, удаан хугацаанд хадгалах вэ гэдэг асуудал юм. Өөрөөр хэлбэл, эмчилгээ хийхээс өмнө урьдчилан сэргийлэх нь хамгийн чухал. Мөн чихрийн хэрэглээ өндөр байх нь зөвхөн шүдний эрүүл мэндэд төдийгүй ерөнхий эрүүл мэндэд сөргөөр нөлөөлөх эрсдэлтэй. Тухайлбал, сахарын хэрэглээтэй холбоотой насанд хүрсэн хүмүүст чихрийн шижин зэрэг өвчний эрсдэл нэмэгдэх боломжтой. Нөгөө талаас, араа шүднүүдээ алдсан хүн хоол хүнсээ хангалттай сайн зажилж чадахгүй байх тохиолдол бий. Ингэснээр хоол боловсруулах үйл явцад сөргөөр нөлөөлөхөөс гадна хоол хүнсний хэрэглээ, цусан дахь сахарын түвшинтэй холбоотой эрсдэлийг нэмэгдүүлэх хүчин зүйл болж болно. Тиймээс араа шүдгүй болсон тохиолдолд хиймэл шүд, шаардлагатай бол имплант хийлгэж, хоол хүнсээ сайн зажилж, жижиглэн боловсруулж идэх боломжийг бүрдүүлэх нь чухал" гэв.
Шүдний эрүүл мэндийг хамгаалах хамгийн зөв арга нь өвдсөний дараа эмчлэхээс илүүтэй өвдөхөөс нь өмнө урьдчилан сэргийлэх явдал юм. Өдөр тутмын зөв арчилгаа, зөв хооллолт, чихрийн хэрэглээг зохистой хэмжээнд барих, тогтмол үзлэгт хамрагдах нь шүдийг эрүүл байлгах үндсэн нөхцөл юм.
