/ТАСС/ Францын “Пари Сен-Жермен” багийн хөлбөмбөгчид Английн “Астон Вилла” багийг 2:1 харьцаагаар хожсоноор УЕФА-гийн Супер цомыг дахин хүртлээ. Австрид болсон тоглолтод Парисын клубын Хвича Кварацхелия (20 дахь минут), Дезире Дуэ (61) нар гоол оруулсан бол англичуудын цорын ганц гоолыг Брайан Мажо /45+1/ хийв.

ПСЖ-ийн хаалгыг Оросын хаалгач Матвей Сафонов хамгаалсан бол Дуэ шилдэг тоглогчоор шалгарчээ. Мөн 17 настай Мажо Супер цомын тэмцээний шийдвэрлэх тоглолтод гоол оруулсан хамгийн залуу хөлбөмбөгчин боллоо. Өмнө нь 1958 онд Английн довтлогч Жимми Гривз 18 настайдаа гоол оруулж байжээ.

Түүнээс гадна энэ удаагийн тоглолтыг Сомалийн шүүгч Омар Абдулкадир Артан шүүснээр УЕФА-гийн Супер цомын тэмцээний тоглолтыг шүүсэн Европын бус анхны шүүгч боллоо. Тэрбээр ДАШТ-2026-гийн тоглолтуудыг шүүх ёстой байсан боловч түүнийг АНУ-д нэвтрүүлээгүй юм.

Ташрамд дурдахад, М.Сафонов ПСЖ-ийн бүрэлдэхүүнд 9 дэх удаагаа тэмцээнд түрүүллээ. Тэрбээр “Краснодар” багаас 2024 оны зун Парисын клубт ирсэн бөгөөд өнгөрсөн хугацаанд Аваргуудын лиг, Францын АШТ, УЕФА-гийн Супер цомд тус бүр 2 удаа, Францын цом, Супер цом, Тив хоорондын цомын тэмцээнүүдэд тус бүр 1 удаа аваргалсан байна.

Түүнчлэн ахлах дасгалжуулагчдын дотроос УЕФА-гийн Супер цомд багаа удирдан түрүүлсэн тоогоор ПСЖ-ийн Луис Энрике 3 дугаарт бичигдэж байна. Тэрбээр 2015 онд “Барселона”, 2025 онд ПСЖ-г удирдан ялалтад хүргэсэн билээ. Түүний өмнө Пеп Гвардиола /4 удаа/, Италийн Карло Анчелотти /5 удаа/ нар бичигдэж байна.