/Kazinform/ АНУ-ын тэргүүлдэг “Энхийн зөвлөл”-өөс санал болгосон 15 зүйл заалт бүхий Газын зурвасын асуудлыг зохицуулах энхийн төлөвлөгөө буюу замын зургийг Израил улс хүлээж авахгүй гэж тус улсын Ерөнхий сайд Б.Нетаньяху ням гаригт мэдэгджээ. Энэ мэдэгдэл нь уг төлөвлөгөөнөөс Израилын тал анх удаа албан ёсоор татгалзсныг илтгэж байна.
Нетаньяхугийн мэдэгдсэнээр, Газын зурвасын нутаг дэвсгэрийн 70 хувийг хянаж буй Израилын цэргүүд “аюулыг зайлуулах”-ын тулд ажиллагаагаа үргэлжлүүлсээр байгаа ажээ.
Euronews агентлагийн мэдээлснээр, Газын зурвас, Иордан голын Баруун эргийн алинд нь ч Палестины улс байгуулахыг хэзээ ч зөвшөөрөхгүй гэж Ерөнхий сайд хэлсэн байна. “Израилын тал 15 заалт бүхий баримт бичгийг хүлээж авахгүй, ХАМАС зэвсгээ хураалгах хүртэл Изарилын цэргийг гаргахгүй” гэж тэрбээр мэдэгдлээ.
Нетаньяху эл мэдэгдлийг хийсний дараа ХАМАС бүлэглэл ням гарагт Вашингтонд хандан, Израилд шахалт үзүүлэхийг уриалжээ. Тус бүлэглэл бямба гаригт мэдэгдэхдээ, АНУ-ын дэмжиж буй энхийн төлөвлөгөөг хэрэгжүүлэхэд бэлэн байгаагаа илэрхийлжээ.
Долоодугаар сарын эцсээр Б.Нетаньяху АНУ-д айлчилсны дараа Ерөнхийлөгч Д.Трамп ярихдаа, өөрийнх нь байгуулсан Энхийн зөвлөл Газын асуудлыг шийдвэрлэх “түүхэн гэрээ”-ний төслийг бэлэн болгосон гэсэн бөгөөд түүнд ХАМАС болон бусад бүлэглэлийн зэвсгийг хурааж, Израилын цэргийг Газаас гаргахаар тусгажээ.
Харин Б.Нетаньяху мэдэгдэхдээ, Палестины бүлэглэлийн зэвсгийг бүрэн хураах хүртэл Израилын арми одоогийн байрлалаа орхихгүй гэсэн юм.
Сэтгэгдэл (1)