/Anadolu/ АНУ-ын засгийн газрын зардал өсөж, орлого буурсны улмаас долоодугаар сарын байдлаар холбооны төсвийн алдагдал 432 тэрбум ам.долларт хүрч, 2021 оны гуравдугаар сараас хойших хамгийн өндөр үзүүлэлтэд хүрчээ. Энэхүү алдагдал 2025 оны долоодугаар сард 291 тэрбум ам.доллар байсан үеэс 48 хувиар нэмэгдсэн байна.
Холбооны төсвийн зардал жилийн өмнөхөөсөө 22 хувиар өсөж, түүхэн дээд үзүүлэлт болох 766 тэрбум ам.долларт хүрсэн бол орлого 1 хувиар буурч 334 тэрбум ам.доллар болжээ.
Тэтгэмжийн төлбөр болох 99 тэрбум ам.долларыг наймдугаар сард төлөхөөр төлөвлөсөн байсан ч долоодугаар сард шилжүүлснээс шалтгаалан дээрх гол тоон үзүүлэлтүүд өссөн байна. Энэ цаг хугацаанаас үүдэлтэй зөрүүг тооцохгүйгээр алдагдлын хэмжээ 333 тэрбум ам.доллар болсон бөгөөд энэ нь өмнөх оныхоос 18 хувиар өссөн үзүүлэлт юм.
Medicare-ийн зардал 66 хувиар өсөж 192 тэрбум ам.долларт хүрсэн ч тохируулга хийсний дараа энэхүү тоо 9% хүртэл буурлаа.
Улсын өрийн хүүгийн төлбөр долоодугаар сарын байдлаар жилийн өмнөхөөсөө 28 хувиар өсөж 118 тэрбум ам.долларт хүрсэн нь зарлагын өсөлтийн гол шалтгаан хэвээр байна.
Гаалийн буцаан олголт өмнөх жилийн 1 тэрбум ам.доллароос огцом өсөж 33 тэрбум ам.долларт хүрсэн нь тухайн сард цуглуулсан 25 тэрбум ам.долларын гаалийн татвараас давжээ.
