/BLOOMBERG/ Колумбид болсон хүчтэй газар хөдлөлтийн улмаас тус улсын гол боомт болон чухал замууд хаагдсанаар кофены экспорт үндсэндээ зогссон байна.
Колумбийн Кофе экспортлогчдын холбооны тэргүүн Густаво Гомесын ярьснаар, хэд хэдэн зам, тэдгээрийн дотор Кали-Буэнавентурагийн хонгил зам хаагдсаны улмаас кофены экспортын хамгийн том боомт болох Буэнавентура-д хүрэх боломжгүй байна. Кофены экспорт үндсэндээ зогсоод байгаа бөгөөд замууд хэзээ нээгдэх нь тодорхойгүй байгаа ажээ. Тээврийн компаниуд ба кофе боловсруулах үйлдвэрүүдийн ихэнх нь газар хөдлөлт болсон бүс нутагт байрладаг учраас нөхцөл байдал хүнд байна.
Энэ үед Нью-Йоркийн бирж дээр арабика сортын кофены фьючерс үнэ сүүлийн хэдэн долоо хоногийн дээд түвшинд хүрснийхээ дараа бага зэрэг доошилсон байна.
Колумби бол арабика сортын кофены үйлдвэрлэлээр дэлхийд хоёрдугаарт ордог улс юм. Өнгөрсөн 2025 онд тус улсад 60 кг-ийн 13 сая 400 мянган шуудай кофе үйлдвэрлэсэн байна. Колумбийн өмнөд нутагт кофены тариалангийн талбайн ихэнх нь төвлөрдөг бөгөөд ургацын багагүй хэсгийг Буэнавентура боомтоор дамжуулан экспортолдог ажээ.
Замууд хаагдсанаас гадна цахилгаан хангамж, харилцаа холбооны дэд бүтцэд доголдол гарсан, ажилчдын байр сууцнууд эвдрэн нурсан зэрэг нь үйлдвэрүүдийн үйл ажиллагаанд нөлөөллөө. Замуудыг сэргээн засварлаж, үйлдвэрүүдийг хэвийн ажиллагаанд оруулсан ч гэсэн их хэмжээгээр хуримтлагдсан кофег боомтуудад авчирснаар тээврийн дэд бүтцийн ачаалал нэмэгдэнэ.
Колумби улс сар бүр 60 кг-ийн 1 сая орчим шуудай кофе экспортолдог тул нэг өдөр саатал гарахад нийлүүлэлтэд багагүй нөлөөлөх юм.
