Дэлхийн малчдын чуулга уулзалтын хүрээнд Говьсүмбэр аймагт болж буй Говийн бүсийн олон улсын малчдын хэлэлцүүлэгт оролцогчид цөлжилтөөс сэргийлэх, байгаль орчноо хамгаалах шийдлийг эрэлхийлж байна.

Монголын говийн малчид байгаль, цаг уурын эрс тэс нөхцөлд бэлчээрийн нөөцийг зохистой ашиглах, мал сүргээ улирлын онцлогт тохируулан маллах, уламжлалт мэдлэг, арга ухаанаа хадгалах нь нүүдлийн мал аж ахуйн тогтвортой байдлыг хангах чухал үндэс болдог. Тиймээс говийн бүсийн малчид бэлчээрийн ургамлын онцлог, хуурай уур амьсгалд сөрөн тэсвэрлэх чадвар, мал сүргийн онцлог, нүүдлийн мал аж ахуйтай холбоотой уламжлалт өв соёлоо олон улсын малчдад танилцуулж байна. Мөн олон орны малчдын туршлагаас суралцаж, өөр нөхцөлд хэрэгжүүлсэн шинэлэг арга, сайн туршлагыг нутагшуулах боломж бүрдэж буй юм. Ийнхүү малчид зөвхөн мэдлэг, туршлагаа бусдад түгээхээс гадна харилцан суралцаж, бэлчээр, мал сүрэг, байгаль орчноо хамгаалах нийтлэг шийдлийг эрэлхийлж байгааг ХХААХҮЯ мэдээлэв.

Хэлэлцүүлгээс гарсан санал, зөвлөмжийг Дэлхийн малчдын, Эмэгтэй малчдын, Залуу малчдын тунхаглал боловсруулахад тусгаж, энэ сарын 14-15-нд Улаанбаатарт болох Дэлхийн малчдын чуулга уулзалтын хуралдаанаар үргэлжлүүлэн хэлэлцэх юм.

Монголын говийн малчдын олон зуун жил байгальтай зохицон амьдарч ирсэн ухаан, мал маллах уламжлалт арга туршлагыг олон улсын малчдын мэдлэгтэй хуваалцан, бэлчээрийн тогтвортой менежмент, уур амьсгалын өөрчлөлт, цөлжилт, нүүдлийн мал аж ахуйн ирээдүйн асуудлаарх олон улсын хэлэлцүүлэгт тусгалаа олж буйгаар онцлог байгааг оролцогчид хэлжээ.

Хэлэлцүүлэгт 18 орны 26, говийн бүсийн аймгуудын 35, нийт 60 гаруй төлөөлөгч оролцож байна.