/Kazinform/ Иран ба Оман улсууд Ормузын хоолойгоор дамжих тээвэрлэлтийн шинэ чиглэлийн талаар тохиролцоонд хүрэхэд ойрхон байгаа боловч энэ нь уг хоолойг нэн даруй нээнэ гэсэн үг биш юм. Энэ тухай Ройтерс мэдээлснийг Kazinform агентлаг дамжууллаа.
Ираны Гадаад хэргийн сайд Аббас Аракчи-гийн хэлснээр, техникийн ба эрхзүйн асуудлууд шийдэгдээгүй байгаа энэ үед түр чиглэлийг нээх асуудлыг хоёр тал хэлэлцэж байгаа ажээ.

Оманы талын мэдэгдсэнээр, тэнгисийн тээврийн асуудлаар Ирантай хийж буй хэлэлцээ “бүтээлч эерэг” байдлаар явагдаж байгаа бөгөөд нэгэнт хүрээд буй ахиц дэвшилд саад болох үйлдлүүдийг хийхгүй байхыг уриаллаа.

Хэлэлцээ болж буй энэ үед хөлөг онгоцнуудын аюулгүй байдалтай холбоотой асуудлууд түгшүүр төрүүлсэн хэвээр байна. АНЭУ-ын эрх баригчдын мэдээлснээр, Ормузын хоолойгоор нэвтэрч байсан тус улсын төрийн өмчийн ADNOC компанийн нефть тээвэрлэгч хөлөг онгоц руу Ираны тал пуужин харважээ. Хөлөг онгоцонд гал гарсныг унтраасан байна.

Исламын хувьсгалыг хамгаалагчдын корпусын /Ираны зэвсэгт хүчин/ мэдэгдэлд дурдсанаар, Ормузын хоолойг нээх эсэх нь Омантай хийж буй хэлэлцээнээс төдийгүй Ираны талын болзлуудыг Вашингтон зөвшөөрөх эсэхээс шалтгаалах ажээ.

АНУ-Ираны мөргөлдөөн эхлэхээс өмнө дэлхий даяар нийлүүлж буй газрын тос ба шингэрүүлсэн шатдаг хийний 1/5 нь Ормузаар дамжин өнгөрч байв. Гэвч тээвэрлэлтэд саатал гарсан нь эрчим хүчний үнэд нөлөөлсөөр байна.

Саяхан АНУ-ын тал мэдэгдэхдээ, гэрээ байгуулсны дараа Ираны боомтуудыг бүслээд байгааг цуцлахад бэлэн гэсэн юм.

Харин Ормузаар дамжин өнгөрөх тээвэрлэлтийн шинэ чиглэлийн газарзүйн солбицлуудыг Иран, Оманы талууд хэдийн зөвшилцөөд байгаа ажээ. Гэхдээ дамжин өнгөрч буй бүх хөлөг онгоцонд аюулгүй байдлын баталгаа өгөх боломжгүй гэдгийг Техран анхааруулсан байна.