/BBC/ Балбын уулчин Нирмал Пуржагийн цогцсыг аврагчид олсон тухай Пакистаны уулын клуб мэдээлжээ. Пакистаны нутаг дахь Броуд-Пик ууланд авирч байсан Пуржа болон бусад 9 уулчин цасанд нурангид дарагдан амиа алдсан билээ.

Пуржа амь эрсэдсэн болохыг Балбын Ерөнхий сайд Балендра Шах батлаад “дэлхийн дээд амжилтын эзэн Нирмал Пуржа болон Балбын 5 уулчин, гадаад орнуудын 4 уулчин Каракорумын нуруунд эмгэнэлтэйгээр амиа алдсан нь биднийг цочролд орууллаа” хэмээн мэдэгдлээ.  

43 настай Пуржа Балбад төрсөн бөгөөд Их Британийн армид алба хааж байжээ. Тэрбээр 2019 онд бусад уулчдын хамтаар 189 хоногийн дотор 8 мянган метрээс дээш өндөртэй бүх 14 оргилд гарснаар дэлхий даяар алдартай болсон юм. Үүнээс хоёр жилийн дараа Netflix компани түүний авиралтын тухай “14 оргил: боломжгүй зүйл гэж үгүй” гэдэг баримтат кино хийсэн байна.   

Пуржа Британийн армид 16 жил, үүнээс 10 жилийн хугацаанд тусгай хүчний ангид алба хаажээ. 2018 онд талийгаач хатан хатан уулын спортод гаргасан амжилтыг нь өндрөөр үнэлэн  түүнд MBE ордон гардуулан өгсөн байна.

Пуржа эхнэр, гурван настай охины хамт Английн өмнөд нутгийн Хэмпшир хотод амьдарч байжээ. Х нийгмийн сүлжээнд хамгийн сүүлд оруулсан постондоо тэрбээр Броуд-Пик оргилд авирах талаар төлөвлөсөн зүйл алга хэмээн бичсэн байна. Харин G2 буюу Гашербрум II гэдэг Каракорумын өөр нэгэн оргилд гарахаар төлөвлөсөн байжээ. Гэвч Пакистан явахынхаа яг өмнө тэрбээр бодлоо өөрчилж, Броуд-Пик оргилд гарахаар шийдсэн бөгөөд 8 мянгаас дээш өндөртэй бүх 14 оргилд хоёр удаа хүчилтөрөгчгүйгээр гарсан түүхэн дэх анхны хүн болох зорилго тавьжээ. Броуд Пикт авирсны дараа дахиад нэг оргилд гарах ёстой байв. 

Броуд-Пик бол авирахад хамгийн хэцүү уулсын нэг юм. Хамгийн анх удаа 1957 онд Австрийн уулчид уг оргилд гарснаас хойш тийшээ олон хүн авирсан бөгөөд хэдэн арван хүн амиа алджээ. 2013 онд гэхэд 6 хүн амиа алдсан байна.