Казахстан Улсын нийслэл Астана хотноо Олон улсын хиймэл оюуны гуравдугаар олимпиад /IOAI 2026/ албан ёсоор нээлээ. Нээлтийн үйл ажиллагаанд Казахстан Улсын Ерөнхийлөгч Касым-Жомарт Токаев оролцож, 2026 оныг "Хиймэл оюун ухаан ба дижитал хөгжлийн жил" болгон зарласнаа онцлов.
Тэрбээр энэ хүрээнд “Дижитал Казахстан-2029” үндэсний стратегийг хэрэгжүүлж, Хиймэл оюуны тухай хуулийг мөрдүүлэх, ухаалаг хотын төслүүдийг өргөжүүлэх, Алатау хотыг Төв Азийн дижитал технологи, инновацын төв болгон хөгжүүлж, олон улсын хөрөнгө оруулалтыг татах зорилт тавьж байгаагаа танилцууллаа.
Энэ удаагийн олимпиадад дэлхийн 106 орны 472 шилдэг сурагч оролцож, хиймэл оюуны чиглэлээрх мэдлэг, ур чадвараа сорин өрсөлдөж байна.
Зохион байгуулагчид олимпиадыг зөвхөн академик тэмцээн төдийгүй хиймэл оюуны салбарын ирээдүйн судлаачид, инженерүүд, инновац бүтээгчид, гарааны бизнес эрхлэгчдийг төлөвшүүлэх олон улсын хамтын ажиллагааны чухал талбар болохыг онцлон тэмдэглэв.
Олон улсын хиймэл оюуны олимпиад нь сурагчдын хиймэл оюуны чиглэлээрх онол, практикийн мэдлэгийг сорихын зэрэгцээ улс орнуудын залуу авьяастнуудын хамтын ажиллагаа, туршлага солилцоог дэмжих зорилготой олон улсын нэр хүндтэй тэмцээн юм.
Сэтгэгдэл (1)