Нийслэлийн цэцэрлэгт хамрагдах хүүхдийн цахим бүртгэл маргааш эхэлнэ.
Эцэг, эх, асран хамгаалагчдаас хүүхдээ цэцэрлэгт хамруулах хүсэлтийг E-Mongolia платформоор дамжуулан наймдугаар сарын 23-ныг хүртэл хүлээн авах юм. Иймд эцэг, эх, асран хамгаалагч нар бүртгэлийн хугацааг сайтар анхаарч, шаардлагатай мэдээллээ урьдчилан бэлтгэн, товлосон хугацаанд хүүхдээ цэцэрлэгт хамруулах хүсэлтээ цахимаар гаргахыг зөвлөж байна. Ингэхдээ өөрийн болон хүүхдийнхээ хаягийн бүртгэл, мэдээллийг нягталж, баталгаажуулсан байх ёстой. Мөн хүүхэд тань өнгөрсөн жил хамрагдсан цэцэрлэгтээ "үргэлжлүүлж явах" эсэх сонголтыг хийх ажээ.
Боловсролын ерөнхий газрын мэдээлснээр улсын хэмжээнд 2026–2027 оны хичээлийн жилд 258,921 хүүхдийг сургуулийн өмнөх боловсролд хамруулах хэрэгцээ бий. Үүнээс 126,827 хүүхэд нь нийслэлд хамаарч байна.
