/Kazinform/ Хятад улсад эдийн засгийн шинэчлэлийг хэрэгжүүлэх, тус улсыг Дэлхийн худалдааны байгууллагад элсүүлэхэд чухал үүрэг гүйцэтгэсэн БНХАУ-ын Төрийн зөвлөлийн дарга асан Жү Рүнжи 98 насандаа Бээжин хотноо таалал төгссөн тухай Синхуа агентлаг мэдээлжээ. Тэрбээр 1998-2003 онд Төрийн зөвлөлийн даргын албан тушаалыг хашсан бөгөөд үүнээс өмнө Төрийн зөвлөлийн орлогч дарга, Хятадын Ардын банкны захирлаар ажиллаж байв.

ХКН-ын Төв хороо, БХАТХ-ын Байнгын хороо, БНХАУ-ын Төрийн зөвлөл, Бүх Хятадын Улс төрийн зөвлөлдөх зөвлөлөөс хамтран гаргасан эмгэнэлийн бичигт Жү Рүнжи “төрийн нэрт зүтгэлтэн, нам төрийн удирдагч” хэмээн тодорхойлжээ. Мөн эдийн засгийн шинэчлэл, татварын ба санхүүгийн тогтолцоог хөгжүүлэх, улсын үйлдвэрийн газруудыг шинэчлэх, Хятад улсыг Дэлхийн худалдааны байгууллагад элсүүлэхэд түүний оруулсан хувь нэмрийг онцлон тэмдэглэсэн байна.

Түүний үйл ажиллагааны гол чиглэл нь эдийн засгийн шинэчлэл байлаа. Тэрбээр улсын үйлдвэрийн газруудыг өөрчлөн байгуулах, татварын ба санхүүгийн зохицуулалтыг боловсронгуй болгоход оролцсон юм. 1990-ээд оны эхээр инфляцийг тогтоон барих, эдийн засгийн хэт халалтаас урьдчилан сэргийлэхэд чиглэсэн арга хэмжээнүүдийг хэрэгжүүлж байв.  

Төрийн зөвлөлийн даргын хувиар Жү Рүнжи Азийн эдийн засгийн хямрал ба их үерүүд болох үед эдийн засгийн бодлогыг удирдан хэрэгжүүлж байлаа. Түүний удирдсан засгийн газар дотоодын эрэлтийг нэмэгдүүлж, хөрөнгө оруулалтыг нэмэгдүүлж, бүтцийн өөрчлөлтийг үргэлжлүүлсэн нь эдийн засгийн тогтвортой өсөлтийг хангахад тус дөхөм болсон юм.

Төрийн зөвлөлийн даргаар томилогдохоосоо өмнө Жү Рүнжи Шанхай хотын дарга, Шанхай хотын ХКН-ын хорооны нарийн бичгийн даргаар ажиллаж байв. Энэ үед тус хот Азийн бизнес, санхүүгийн төв болох эхлэл тавигдсан байна.