"Оюу толгой" компани өнөөдөр Улсын төв нэгдүгээр эмнэлгийн Бөөр судлалын тасагт 67 сая төгрөгийн өртөг бүхий зүүний чиглүүлэгчтэй "Допплер" хэт авиан аппартыг гардуулж өглөө. Тус аппаратыг ашигласнаар Монголчууд гадаадад өндөр үнэтэй шинжилгээ хийлгэлгүй дотооддоо эрт оношлуулах боломжтой болж байгаа юм. Энэ үеэр "Оюу толгой" компанийн гүйцэтгэх захирал Армандо Торрес "Эрүүл мэндийн салбар бол их хариуцлагатай, буянтай салбар. Бидний туслалцаа зөвхөн үүгээр ч зогсохгүй цаашдаа ч мөн тусалж дэмжин ажиллах болно" гэлээ.

Эрүүл мэндийн өвчлөлийн статистик мэдээнээс харахад бөөр, шээсний замын тогтолцооны эмгэгээс үүдэлтэй нас баралтаар Монгол улс 4-р байрыг эзэлж байна. Манай улсад бөөрний түүдгэнцэр, завсрын эд, судас болон системийн өвчний шалтгаант бөөрний эмгэгүүдийг эрт оношлоход шаардлагатай аппарат байхгүйгээс хожуу шатанд оношлогдон хүндэрч, бөөр орлуулах эмчилгээ ихсэхэд хүрдэг байна. Уг аппарат нь бөөрний биопси хийх ажилбарын технологийг дэлхийн жишигт нийцүүлэх, бөөрний архаг өвчтэй, архаг гемодиализийн эмчлүүлэгчийн судасны тогтмол хяналтыг сайжруулах үүрэгтэй аж.

Нэгдүгээр эмнэлгийн бөөр судлалын тасагт жилдээ 1200 өвчтөн хэвтэн эмчлүүлж, амбулатороор бөөр судлалын тасагт 18000 гаруй үзлэг хийдэг байна. Мөн аймаг, дүүргүүдээс ирсэн хүмүүст зөвлөгөө, тусламжийг үзүүлдэг аж. Тус эмнэлэг аппараттай болсноор хүмүүс гадаадад өндөр үнэтэй шинжилгээ хийлгэлгүй эх орондоо түргэн хугацаанд оношлуулах боломжтой боллоо.