Унгарын шигшээ багийн довтлогч Доман Сонгот хоккейн дэлхийн аварга шалгаруулах тэмцээний түүхэнд 1949 оноос хойших хамгийн залуу тоглогч болж түүхэнд нэрээ бичүүллээ. Тэрбээр Германы шигшээ багтай хийсэн хэсгийн шатны тоглолтын үеэр 16 нас 11 сар 2 хоногтойдоо мөсөн талбайд гарсан байна.
Өмнөх хамгийн залуу оролцогчийн амжилтыг 1949 онд Норвегийн шигшээ багийн довтлогч Лейф Сульхейм тогтоож байсан бөгөөд тэрбээр 16 нас 6 сар 29 хоногтойдоо дэлхийн аваргад оролцож байжээ. Лейф Сульхейм Норвегийн “Фурусет” клубт тоглож байсан бөгөөд 2024 оны долоодугаар сард 92 насандаа таалал төгссөн юм.
Д.Сонгот Финландын “КооКоо” клубт тоглодог бөгөөд энэ улирлын Финландын 20 хүртэлх насны аварга шалгаруулах тэмцээнд 37 тоглолтод оролцож, 9 шайб оруулан, 7 оновчтой дамжуулалт хийсэн амжилттай тогложээ.
Тэмцээний хэсгийн шатны эхний тоглолтод Германы баг Унгарын шигшээг 6:1-ээр илт давуу ялсан бол дараагийн тоглолтод германчууд Казахстантай, унгарчууд АНУ-ын шигшээ багтай тоглохоор болсон байна. А хэсгийн тоглолтод Шведийн шигшээ баг Австрийн багийг 4:2-оор хожсон байна.
Энэ удаагийн ДАШТ Швед, Дани улсад тавдугаар сарын 9-нээс 25-ны өдрүүдэд үргэлжилж байна. Өнгөрсөн жилийн аварга Чехийн шигшээ баг Швейцарийн багийг 2:0-ээр хожиж, дэлхийн аварга болсон юм.
Олон улсын хоккейн холбооны шийдвэрээр дэлхийн таван удаагийн аварга ОХУ-ын шигшээ баг энэ жилийн тэмцээнд оролцохгүй байгаа нь онцлох үйл явдлын нэг болоод байна.
Эх сурвалж: ТАСС
