Нийслэлийн автозамын ачааллыг бууруулах, хөдөлгөөний урсгалыг оновчтой зохион байгуулах зорилтын хүрээнд Нисэхийн тойргийг олон түвшинт уулзвар болгон шинэчлэх ажил үргэлжилж байна. Уг бүтээн байгуулалтын ажлын хүрээнд инженерийн шугам сүлжээний өргөтгөл, шинэчлэлийн томоохон ажлууд хийгдэж байгаа юм.
Тухайлбал, одоо байгаа дулааны шугамыг шилжүүлэх, өөрчлөх ажлыг өнгөрсөн сард эхлүүлсэн бөгөөд өнөөдрийн байдлаар дулааны худаг хоорондын сувагчлалын ажил, газар шорооны ухмал, худгийн төмөр бетон бүтээцийн цутгалт зэрэг ажлууд хийгдэж байна. Мөн авто зам доогуур байрлах ус хангамж, ариутгах татуургын шугамыг хүчитгэж хамгаалах, холбооны болон цахилгааны худаг сувагчлалыг шилжүүлэх, шинээр байгуулах, авто замын борооны ус зайлуулах шугамыг шинээр барих зэрэг ажлуудыг үе шаттайгаар гүйцэтгэж байна.
Энэхүү олон түвшинт уулзвар ашиглалтад орсноор нийслэлийн хөдөлгөөний эрчимтэй бүсийн нэг болох Нисэх орчмын замын ачаалал буурч, замын хөдөлгөөний нэвтрүүлэх чадвар сайжрах, цаг хугацааны хэмнэлттэй, аюулгүй зорчих боломж нэмэгдэх юм.
Эх сурвалж: Нийслэлийн Засаг даргын Тамгын газар
